Është arrestuar në Norvegji një person, për të cilin prokuroria ka dyshime se është njeriu i dytë që tronditi Tiranën me një fushatë tritoli, ku shënjestra e një prej eksplozivëve ishte edhe familja e ministrit të Brendshëm, Saimir Tahiri.
Ai quhet Baftjar Bruka dhe dyshohet se është bashkëpunëtori Vladimir Gjutës në vendosjen e tritolit te farmacia e babait të Saimir Tahirit.
Nipi i Vladimir Gjutajt, 24 vjeçari Baftjar Bruka u largua nga Shqipëria dy ditë pas arrestimeve nga policia të anëtarëve të “grupit të tritolit”.
Baftjar Bruka ishte shpallur gjithashtu në kërkim ndërkombëtar edhe nga autoritetet italiane ku dyshohet se Bruka bashkë me një sirian, kishin planifikuar sulme terroriste në qytetin e Venecias.
Përveç Vladimir Gjutajt i arrestuar vetëm 6 ditë më parë nga forcat RENEA në tunelin e Kalimashit për shpërthimin me tritol vazhdojnë të qëndrojnë nën masën “arrest me burg”, Lumjan Matmuja, Kamber Bruka, Erjon Dule dhe Emirjon Gjuta.
Ndërsa pas disa ditë qëndrimi në burg është liruar Ernest Gjuta për mungesë provash që e implikojnë në shpërthimin me tritol.
Sipas hetimeve Vladimir Gjutaj në bashkëpunim me nipin e tij Baftjar Bruka dhe personat e tjerë të arrestuar janë pjesë e grupit që vendosi tritolin në farmacinë e babait të ministrit të Brendshëm, por edhe pranë vendparkimit të makinë së Bashkim Tahirit. /tesheshi.com/
