Ari i tha lamtumirë muajit të tij më të mirë që nga korriku 2020, pasi kriza e fundit bankare dhe pritshmëritë për një politikë monetare më pak agresive nga Rezerva Federale kanë kthyer shumë investitorë në “përqafimin” e metalit të çmuar.
Çmimi në tregun spot (tregu i cash-it) aktualisht është 1,981 dollarë për ons, që do të thotë se në baza mujore fitimet arrijnë në më shumë se 8.5%. Një performancë, e cila është më e mira e tre viteve të fundit.
Është karakteristikë se pas rënies së papritur të Silicon Valley Bank dhe Signature Bank, çmimi i arit u ngjit përkohësisht mbi pragun psikologjik të 2000 dollarëve.
Kjo falë pritshmërive se Rezerva Federale e SHBA-së mund t’i japë fund politikës së shtrënguar monetare duke “ngrirë” rritjen e normave të interesit në mënyrë që të shmangë një domino kolapsi bankar.
Tani për tani, sigurisht, shqetësimet për sektorin financiar janë lehtësuar kryesisht, pasi investitorët besojnë se më e keqja ka mbaruar. Prandaj, disa tani besojnë se FED do të vazhdojë të rrisë normat e interesit, me një fokus të rinovuar në frenimin e inflacionit.
Duhet të theksohet se megjithëse ari konsiderohet një strehë e sigurt në kohë pasigurie, normat më të larta të interesit të FED ndikojnë negativisht në atraktivitetin e tij për shkak të dollarit më të shtrenjtë. /tesheshi.com/
