Mbrojtësi i kombëtares shqiptare, Andi Lila është bërë sërish protagonist kryesor në kampionatin grek të futbollit. Ndërsa fundjavën e shkuar ishte duartrokitur për rikthimin e tij tek PAS Janina, këtë fundjavë lojtari u kritikua ashpër pas festimit të golit në ndeshjen ndaj Olimpiakosit. Në fakt, goli i tij ishte goli i nderit në disfatën e turpshme të skuadrës së tij nga Olimpiakos, (5-1).
Mediat greke shtuan presionin ndaj presidentit të klubit, Jorgos Kristovasilis për të marrë një vendim të ashpër lidhur me lojtarin. Ekziston mundësia që Andi Lila edhe të pezullohet apo edhe të largohet krejt nga PAS Janina, për mënyrën e të festuarit.
Forma e mirë e lojtarëve të tjerë të kombëtares kuq e zi, ishte e pranishme edhe këtë javë. Herolind Shala nuk ndalon së shënuari. Mesfushori shqiptar ka realizuar golin e epërsisë për skuadrën e tij Liberec në duel me Viktoria Pizen, por që nuk rezultoi i mjaftueshëm për ta fituar ndeshjen, pasi më pas rivalët realizuan edhe dy gola të tjerë për të përmbysur gjithë ndeshjen.
Nga goli nuk është ndarë as mesfushori tjetër i kombëtares shqiptare, Amir Abrashi. Një “perlë” e vërtetë nga më shumë se 30 metra ka përfunduar në rrjetën e skuadrës FSV Frankfurt, në duel me Fraiburgin. Goli i mesfushorit ka qenë vrasës për kundërshtarin pasi ka vulosur fitoren e skuadrës së tij, (2-0).
“Engjëll dhe djall”. Ky është përshkrimi për Ledian Memushajn, që realizoi gol dhe u ndëshkua me karton të kuq në barazimin e skuadrës së tij Peskara në udhëtim tek Viçenca. Në fakt goli i Memushajt kaloi në epërsi skuadrën e ti, por ndëshkimi me karton të kuq i mundësoi barazimin kundërshtarëve, në ndeshjen që përfundoi 2-2.
Kapiteni Cana dhe Ermir Lenjani janë mundur 1- 4 nga PSG. Edhe pse kanë kaluar të parët në avantazh, lojtarët e Nantës nuk e kanë ndalur dot furinë e PSG-së në pjesën e dytë. Vetëm barazim 0-0 për Rijekën e Balajt dhe Roshit. Shkodrani luan 90 minuta, ndërkohë fieraku aktivizohet në të 78-n. Barazim 1-1 edhe Karabak i Ansi Agollit. Bazeli mund 3-1 Luganon, ndërkohë që Gashi e Aliji e ndjekin nga stoli.
Derbin e shqiptarëve të Zvicrës ndërmjet Luzernit dhe Zyrihut e kanë fituar këta të parët minimalisht. Jahmir Hyka në këtë duel me Luzernin, përballë kishte mbrojtësin shtatlartë të kombëtares Berat Xhimshiti që luajti nga minuta e parë. Ndërkohë që Basha e Sadiku e kanë ndjekur ndeshjen nga stoli. /tesheshi.com/
