Presidenti maqedonas, George Ivanov, nuk tërhiqet nga vendimi i tij i marrë javë më parë për amnisti ndaj një sërë politikanësh dhe zyrtarësh të përfshirë në afera.
Edhe pse ai është kritikuar për këtë edhe nga faktori ndërkombëtar, veç atij të brendshëm, madje me thirrjen e hapur për t’u tërhequr, sërish kreu i shtetit ka vendosur të qëndrojë stoik duke ngulur këmbë si mushka .
Në një konferencë për shtyp të mbajtur së fundi, i pyetur nëse përsëri do ta marrte një vendim për falje si ai 12 prillit, Ivanov ju përgjigj pa asnjë hezitim: “Po!”
Sakaq, zyrtari i lartë amerikan për Ballkanin, Daniel Server, vlerëson se amnistia e presidentit Ivanov ishte një ide e keqe; por njëkohësisht thotë se nuk i pëlqen ajo që opozita nuk po dëshiron që të përballet në zgjedhje.
“Mendoj se abolimi me të vërtet ishte një ide e keqe që e rrënoi marrëveshjen e arritur dhe, prishja e vendimit për falje do të jetë me rëndësi për dalje nga kriza politike. Skandali me përgjimet është i turpshëm dhe qeveria e kryeministrit Gruevski u turpërua para BE-së, SHBA-ve dhe popullit maqedonas. Kjo gjë është për të ardhur keq. Gjithashtu nuk më pëlqen ideja që opozita nuk dëshiron të përballet në zgjedhje. Mendoj se zgjedhjet janë me rëndësi për situata të këtilla, por të kihet besim se ato do të janë të lira dhe demokratike. Tani kur zgjedhjet përsëri u anuluan, është shumë me rëndësi që të arrihet në një stad ku Maqedonia do të mund të organizojë zgjedhje të cilat do të përjetohen si legjitime nga shumica e popullit”, vlerësoi Server.
Vendimi për amnisti i presidentit Ivanov ishte tronditës, si për një pjesë të klasës politike, veçanërisht asaj opozitare, e si për një pjesë të opinionit ku përfshihet dhe shoqëria civile, pasi kështu ai i liroi nga ndëshkimi ligjor të gjitha ata ish-qeveritarë mbi të cilët bien akuza të rënda për afera korruptive dhe jo vetëm, sidomos atë të përgjimeve.
M/ Krasniqi – /tesheshi.com/
