Amnesty International u bëri thirrje vendeve të Bashkimit Evropian që të ndalojnë furnizimin me armë për Izraelin, në një letër drejtuar kryediplomatit të bllokut, Josep Borrell.
Grupi i të drejtave të njeriut i kërkoi gjithashtu BE-së të mos investojë ose të tregtojë me vendbanimet izraelite në territoret e pushtuara palestineze, gjë që u konsiderua e paligjshme në një opinion të fundit të lëshuar nga Gjykata Ndërkombëtare e Drejtësisë (ICJ) në Hagë.
Amnesty e dërgoi letrën përpara një takimi të ministrave të jashtëm të BE-së në Bruksel për të diskutuar luftën e Gazës midis Izraelit dhe Hamasit, e cila filloi më 7 tetor.
Në korrik, GJND-ja tha në një opinion këshillues jo-detyrues se pushtimi gati 60-vjeçar i territoreve palestineze nga Izraeli shkel ligjin ndërkombëtar dhe duhet të përfundojë sa më shpejt të jetë e mundur.
Megjithëse vendimi i Gjykatës Botërore nuk është detyrues, ai është i rëndësishëm sepse ka autoritetin e së drejtës ndërkombëtare dhe mund të dobësojë mbështetjen për Izraelin.
Pushtimi i paligjshëm i territoreve palestineze
Gjykata më e lartë e Kombeve të Bashkuara njoftoi se vendbanimet izraelite, të cilat janë ndërtuar në territoret e pushtuara palestineze, janë të paligjshme.
GJND-ja tha gjithashtu se anëtarët e gjykatës, përfshirë vendet e BE-së, kanë përgjegjësinë të mos mbështesin politikën okupuese ose të pranojnë status quo-në e krijuar nga Izraeli.
Amnesty International tha në një letër drejtuar Borrelit se vendet e BE-së që “furnizojnë armë, teknologji dhe pajisje” Izraelit nuk po e përmbushin këtë detyrim.
Grupi i të drejtave të njeriut i bëri thirrje gjithashtu Komisionit Evropian që të rishikojë Marrëveshjen e Asociimit BE-Izrael për pajtueshmërinë me detyrimet e të drejtave të njeriut.
Në luftën e vitit 1967, Izraeli pushtoi Bregun Perëndimor, Rripin e Gazës dhe Jerusalemin Lindor, zona të Palestinës historike që palestinezët i duan si pjesë të shtetit të tyre. Që nga viti 1967, Izraeli ka ndërtuar vazhdimisht vendbanime në Bregun Perëndimor dhe vazhdimisht i zgjeron ato.
Udhëheqësit izraelitë pretendojnë se zonat nuk janë të pushtuara ligjërisht sepse janë në territor të diskutueshëm, por Kombet e Bashkuara dhe shumica e komunitetit ndërkombëtar i konsiderojnë ato si territore të pushtuara nga Izraeli. /tesheshi.com/
