Viktimë e kureshtjes së një djali 4-vjeçar që po vizitonte Muzeun Hecht në Haifa me të atin, një vazo rreth 3500-vjeçare ra, duke e bërë copë-copë.
Sipas BBC, vazoja daton në epokën e bronzit, mes viteve 2200 dhe 1500 para Krishtit dhe konsiderohej si një artefakt i rrallë për shkak të gjendjes shumë të mirë.
Vazoja u vendos pranë hyrjes së muzeut, jashtë vitrinës së xhamit, pasi është filozofia e muzeut t’u japë vizitorëve mundësinë të admirojnë ekspozitat – aty ku është e mundur – pa “pengesa”.
Babai i fëmijës deklaroi se djali i tij e tërhoqi butësisht vazon sepse ishte kurioz të shihte se çfarë kishte brenda, duke bërë që objekti antik të binte në dysheme dhe të thyhej. Ai përshkroi për rrjetin britanik tronditjen e tij kur pa fëmijën pranë vazos së thyer dhe shpjegoi se shkoi menjëherë të fliste me rojen pasi qetësoi djalin.
Muzeu Hecht tha se fëmija ishte ftuar përsëri në ekspozitë me familjen e tij për një turne me guidë pas incidentit të disa ditëve më parë.
“Ka raste kur objektet shkatërrohen qëllimisht dhe këto raste trajtohen me ashpërsi dhe përfshirje të madhe të policisë. Në këtë rast, megjithatë, nuk është kështu. Vazoja u shkatërrua aksidentalisht nga një fëmijë i vogël që vizitoi muzeun dhe reagimi ynë do të jetë në përputhje me rrethanat”, tha një zyrtar i muzeut.
Një konservator special ka marrë përsipër restaurimin e vazos, e cila së shpejti do të kthehet në vendin e saj. Sa i përket muzeut, ai deklaroi se, pavarësisht incidentit, do të vazhdojë të ekspozojë disa antika pa vitrinë, pasi kjo kontribuon në një eksperiencë më të mirë për publikun. /tesheshi.com/
