Ambasadori britanik, Ruairí O’Connell, e ka quajtur të papranueshme vendimin e Gjykatës Supreme për rikthimin në garë të personave, të cilëve Komisioni Qendror i Zgjedhjeve u kishte dhënë “vijë të kuqe” në zgjedhjet e 22 tetorit.
Madje, diplomati anglez i ka quajtur “kriminelë” të gjithë këta kandidatë, të cilët ishin në proçese gjyqësore.
“KQZ ka marrë vendim të mirë për deçertifikimin në fillim, dhe Gjykata Supreme ia ka dhëne te drejtën krimineleve për të kandiduar. Ka qene pak befasuese sepse ligji ka qenë i qartë që nëse dikush dënohet për disa krime nuk lejohet te kandidojë për zgjedhje”, ka thënë ai në një bashkëbisedim me qytetarë.
Më tej, O’Connel thotë se qytetarët e kanë fjalën e fundit, ata mund te zgjedhin, ata mund të vendosin.
“Nëse dëshirojnë të pastrojnë jetën publike të Kosovës prej krimineleve, ata duhet të mos votojnë për kriminelët”, thotë ai.
Në fund, diplomati britanik thekson se në vendin e tij do të ishte skandal i madh nëse një parti përfshin një kriminel në listën zgjedhore.
“Nëse kjo parti vazhdon po ashtu të mbajë atë në listën e kandidateve, nuk është vetëm ai kandidat që do të ndëshkohet, por krejt partia do të vuante nga ky vendim”, ka thënë ai.
Edhe Ambasada e SHBA-ve ka shprehur keqardhje për vendimin e Supremes për t’i kthyer në garë 89 kandidatët e diskualifikuar nga KQZ-ja përfshirë këtu edhe Zafir Berishën kandidat i NISMA-s për kryetar të Prizrenit.
