Grupet kriminale dhe krimet në familje ishin objekt i debateve në mbledhjen e komisionit parlamentar të Sigurisë, ku ka raportuar Drejtori i Përgjithshëm i Policisë për Rendin dhe Sigurinë, Altin Qato.
Deputeti demokrat, Flamur Noka, ka hedhur akuza të forta në drejtim të policisë, ndërsa ka shtuar se Shqipëria është bërë një ndër vendet kryesore për tranzitin e drogës.
“Një Shqipëri, që është vend tranzit i drogave të forta, nuk mund të ketë polici të besueshme. Drejtues të lartë të policisë janë të përfshirë në trafikun e kanabisit. Ndërsa drejtues policie janë të larguar me kërkesë të ambasadës amerikane. Nëse do vazhdoni ta mbani policinë në lidhje me krimin, do ta degradoni dhe kalbeni. Në 4 vitet që shkuan nuk u fol gjë tjetër vetëm për drogën.
Ato që thashë nuk bazohen në hamendje. Deklaratat e prokurorisë dhe informacionet e shërbimit sekret flasin për përfshirjen e zyrtarëve të policisë së shtetit janë të lidhur me drogën. Partnerët ndërkombëtarë sidomos ata amerikane e kanë evidentuar këtë”, deklaroi Noka.
Po ashtu, një ndër pyetjet që është ngritur në Komisioni ka qenë nga deputeti i LSI-së, Endrit Brahimllari, i cili ka kërkuar të dijë se çfarë masash janë marrë nga policia lidhur me dhunën në familje.
Drejtori i Policisë për Rendin dhe Sigurinë ka deklaruar se nuk mjafton vetëm policia që të luftojë këtë fenomen, por që duhet ndihmë edhe nga aktorët e tjerë.
“Po analizojmë rastet dhe po studiojmë ndërhyrjen. Nuk mjafton policia. Duhet dhe partneritet mes aktoreve të tjerë”, tha Qato. /tesheshi.com/
