Shefi i frikshëm i shërbimeve sekrete ruse, Nikolai Patrushev, ka mbërritur sot në Beograd për një mision special të ngarkuar nga Putin.
Perëndimi është shfaqur i shqetësuar për këtë vizitë e cila bëhet në kuadër të një vale destabilizimi në të gjithë Ballkanin.
Kreu i Këshillit Rus për Sigurinë që përmbledh të gjitha agjencitë e spiunazhit, ka kërkuar në Beograd firmosjen e një memorandum me Serbinë, përkatësisht me ministrinë e Brendshme të këtij vendi.
Siç bën të ditur Sputnik, kryespiuni rus tha se propozimi i tij koncepton rivitalizimin e bashkëpunimit të vjetër që ka qenë permanent ndërmjet ish-KGB-së dhe ish-UDB-së.
Nikolai Patrushev ka zhvilluar takime të ndara me zv.kryeministrin Iviça Daçiq dhe me Presidentin Tomislav Nikoliq; ndërkohë që nuk është takuar dhe me kryeministrin Vuçiq.
Në një njoftim të shpërndarë për mediat ruse, theksohet se Patrushev po bisedon me autoritetet serbe për të ashtuquajturin “ekstremizëm në Kosovë dhe Metohi”.
Andrei Manoilo, një anëtar i këshillit të superdrejtorisë ruse të spiunazhit deklaroi se “Kosova është një terren pjellor për ekstremistët që po shpërndajnë influencën e tyre në shumë drejtime”.
Sputnik thekson se ky udhëtim i Patrushevit në Serbi nuk do të jetë vizita e parë e tij në Beograd, pasi ai shkon shpesh në Ballkan.
Patrushev është pasuesi i Vladimir Putinit në krye të shërbimit sekret rus, FSB dhe u rrit në detyrë pas krijimit të agjencisë “mëmë”që mbledh të gjitha agjencitë e spiunazhit. /tesheshi.com/
