Një nga aktorët më të mëdhenj në historinë e filmit, Alfredo James Pacino, i njohur në botë si Al Pacino, mbushi 85 vjeç. Me një karrierë që shtrihet në më shumë se pesë dekada, Pacino mbetet një simbol i talentit të jashtëzakonshëm në aktrim dhe karizmës së paimitueshme që ka shënuar jo vetëm kinemanë amerikane, por edhe atë botërore.
Ai lindi më 25 prill 1940 në Nju Jork, në familjen e Salvatore Pacino, një italian, dhe Rosa Gerard, një amerikane. Prindërit e tij u divorcuan kur ai ishte dy vjeç, pas së cilës Pacino u zhvendos me nënën e tij në lagjen e varfër të Bronksit, për të jetuar me gjyshërit e tij, të cilët ishin me origjinë nga Siçilia.
Dashuria e tij për aktrimin u zhvillua herët, ku ai e përsos aftësinë e tij në Studion e famshme të Aktorëve nën drejtimin e Lee Strasberg, i cili më vonë do të luante me të në filmin kult “The Godfather Part II”.
Ngritja e tij filloi në vitin 1972 me rolin e Michael Corleone në filmin “Kumbari”, një adaptim mjeshtëror filmik i romanit të Mario Puzos, me regji nga Francis Ford Coppola. Roli i solli atij nominimin e parë për çmimin Oscar dhe ia ndryshoi përgjithmonë jetën, si dhe historinë e kinemasë. Në vitet në vijim, pasuan filmat “Serpico” (1973), “The Godfather Part II” (1974), “Dog Day Afternoon” (1975) dhe “…And Justice for All” (1979), duke e bërë atë fytyrën e një brezi të ri të kinemasë amerikane.
Pas një periudhe disi më të qetë në vitet 1980, Pacino bëri një rikthim triumfues si Tony Montana në filmin “Scarface” (1983), i cili u bë një klasik kult dhe një referencë e preferuar në kulturën pop. Në vitin 1992, ai më në fund fitoi çmimin Oscar për aktorin më të mirë për rolin e kolonelit të verbër në filmin “Aroma e një gruaje”.
Pacino ka shkëlqyer në një sërë zhanresh gjatë gjithë karrierës së tij, nga epikat gangstere te dramat gjyqësore dhe trillerat psikologjikë. Rolet e tij në filma të tillë si “Carlito’s Way”, “Heat” (në të cilin e gjeti veten për herë të parë krah për krah me Robert De Niron në të njëjtën skenë), “Donnie Brasco”, “The Insider”, deri te “The Irishman” dhe “House of Gucci”, tregojnë shkathtësinë dhe pasionin e tij të përjetshëm për aktrimin.
Përveç filmit, Pacino pati një karrierë të shquar në teatër dhe fitoi dy çmime Tony. Respekti i tij për Shekspirin dhe letërsinë klasike është gjithashtu i dukshëm përmes projekteve si “Looking for Richard”.
Për breza të tërë aktorësh dhe adhuruesish të filmit, Pacino mbetet një model dhe frymëzim. /tesheshi.com/
