Kuvendi i Kosovës nuk ka arritur të zgjedhë një keytar të ri për herë të katërt, duke zgjatur një krizë legjislative që ka penguar formimin e një qeverie të re për më shumë se dy muaj pas zgjedhjeve pa një fitues të qartë.
Sipas kushtetutës së Kosovës, kryetari i parlamentit duhet të votohet përpara se fituesi i zgjedhjeve të formojë një qeveri. Por pa mbështetje ndërpartiake, kjo po rezulton e vështirë dhe ngërçi ka nxjerrë në pah përçarje të thella në shtetin më të ri të Evropës, shkruan kështu Reuters.
Në zgjedhjet parlamentare të 9 shkurtit, pas një fushate të ashpër zgjedhore në të cilën kryeministri në largim Albin Kurti e quajti opozitën “hajvanat”, partia e tij Vetëvendosje mori më shumë vota, por jo të mjaftueshme për shumicën në parlament.
Partitë opozitare, të cilat kanë thënë se nuk do të hyjnë në një koalicion me partinë e tij, fajësojnë pjesërisht Kurtin për përshkallëzimin e tensioneve në veriun kryesisht serb të vendit, të cilat kanë përkeqësuar perspektivat e Kosovës për t’u bashkuar me Bashkimin Evropian dhe kanë shtyrë bllokun të vendosë sanksione ndaj Kosovës.
Skena politike e përçarë mund të rezultojë në zgjedhje të parakohshme më vonë këtë vit nëse nuk formohet një qeveri.
Opozita kundër Kurtit
E zgjedhura e Kurtit për kryetare të parlamentit, ministrja në largim e Drejtësisë, Albulena Haxhiu, mori 57 vota të premten njësoj si në votimet e mëparshme, më pak se 61 votat e nevojshme.
Parlamenti duhet të mblidhet përsëri brenda 48 orësh për të votuar. Partitë opozitare i kanë kërkuar Kurtit të ndryshojë kandidatin e tij nëse dëshiron mbështetjen e tyre.
“Nuk ka vullnet nga partitë politike për të konstituuar një parlament”, tha Haxhiu pas votimit. Sipas ligjit, parlamenti duhet të vazhdojë të mblidhet derisa të zgjidhet një kryetar.
Pas kësaj, presidenti i shtetit do t’i japë partisë së Kurtit mandatin për të formuar një koalicion të ri qeverisës.
Nëse Kurti nuk arrin ta bëjë këtë, mandati do t’i jepet Partisë Demokratike të Kosovës, e cila fitoi numrin e dytë më të lartë të votave. Nëse edhe ata dështojnë, mandati do t’i jepet Lidhjes Demokratike të Kosovës, dhe nëse të gjitha përpjekjet dështojnë, presidenti mund të shpallë zgjedhje të parakohshme, të cilat janë rezultatet që presin shumë analistë. /tesheshi.com/
