Kanë bërë përshtypje deklaratat breshëri të dy eurodeputetëve Kukan e Fleckenstein dje nga Brukseli të cilat kanë qenë të hidhura për opozitën.
Por siç duket do të ketë dhe të tjera këto ditë.
Komisioni Europian në Bruksel ka organizuar një tur të madh me një grup të gjerë reporterësh nga mediat kryesore të Tiranës duke paguar gjithçka: udhëtimin, akomodimin ngrënien etj., e duke i dhënë akses në të gjitha kancelaritë e Europës politike.
Pas dy reporterëve eurodeputetë, priten të vijë mesazhe dhe nga gjermani që drejton Komisionin e Jashtëm të PE-së që është një politikan i rëndësishëm i partisë së Angela Merkelit, edhe pse ka një mbiemër skocez, Mcallister.
Ai ka folur një herë kundër bojkotit, por pritet të japë një mesazh të fuqishëm para reporterëve shqiptarë të cilëve Komisioni u ka ofruar facilitete që t’i transmetojnë materialet në kohë reale.
Më pas në axhendë janë krerët e grupeve të mëdha politike në Parlamentin Europiane, ai socialist, ai i PPE-së dhe grupi liberal.
Ndërkohë që stacioni i radhës do të jetë Komisioni ku eurokomisioneri Hahn dhe shefja e politikës së Jashtme Federica Mogherini, pritet të japin mesazhet finale dhe që kanë të bëjnë me Vettingun më shumë, prej nga pritet të nisë një operacion i madh antikorrupsion.
Një muaj më parë në Tiranë ishte një grup i madh gazetarësh nga vendet e BE-së të cilët takuan të gjithë aktorët politikë dhe diplomatikë në Shqipëri dhe shpërndanë më mediat kryesore të Europës përplasjen që po ndodh në kryeqytetin shqiptar.
Prej disa muajsh BE ka shpërndarë një sasi të mëdha fondesh për të mbrojtur Ballkanin Perëndimor nga propaganda ofensive e Moskës që kërkon të trazojë situatën duke ruajtur sferën e saj të influencës.
Ndaj dhe Brukseli ka ndërmarrë një kundërofensivë.
Në rastin e Shqipërisë, pikërisht manovra e BE-së është që të ruajë stabilitetin politik të vendit duke siguruar një proces të qetë zgjedhor, por edhe të nisë sa më parë operacionin e financuar nga Europa dhe SHBA për reformimin e Drejtësisë shqiptare; reformim, që nuk ka lidhje thjeshtë me Drejtësinë, por që pritet që organet e reja të gjyqësorit të ndërmarrin spastrimin e politikës.
Media-Trip në Bruksel e gazetarëve më në zë të Tiranës, të cilët çdo ditë mbulojnë politikën shqiptare, rreket të sigurojë edhe një mbulim nga afër të asaj që ndodh në BE për Shqipërinë.
Jo vetëm deklarata por dokumente dhe strategji, në mënyrë që kur të kthehen në Tiranë, ata mos të jenë thjesht përcjellës së konferencave pa pyetje të politikanëve apo deklaratave që janë në fakt kaseta të gatshme dhe që nuk përpunohen apo analizohen nga reporterët.
Ky akt i Komisionit që ka financuar të gjithë këtë udhëtim mediatik, që në fakt është i pari i ndodhur në këtë përmasë, simbolizon një shtytje që BE kërkon t’i japë opinionit publik shqiptar që deri tani është mësuar thjesht me papagallë. /tesheshi.com/
