Nga Blendi Gashi
“Jam i pafajshëm unë dhe bashkëpunëtorët e mi. Sa kam shërbyer në cilësinë e ministrit asgjë të paligshme nuk kam bërë”. Kështu deklaroi Fatmir Limaj më 28 prill të vitit 2010, datë kur zyrtarisht nisi “persekutimi” ndaj tij, ku më tej për tetë vite u hetua nga prokuroria nën dyshimin për keqpërdorim të 80 milion eurove sa ishte ministër i Transportit.
Dhe fjala e tij doli, pasi Gjykata Themelore në Prishtinë më 24 nëntor e shpalli të pafajshëm së bashku me bashkëpunëtorët e tij në të gjitha pikat e aktakuzës; për krim të organizuar, shpërdorim të detyrës zyrtare dhe marrje ryshfeti.
Sigurisht, i gëzuar se hoqi një barrë të madhe dhe doli fitimitar ndaj vendorëve e ndërkombëtarëve që e donin praga grilave, “Çeliku” në një konferencë për media u tregua emocional në fjalimin e tij të parë pasi doli i pastër me ç’rast tha se ata që deshën dënimin e tij dhe projektuan persekutimin e tij bën gabim shumë të madh duke e prekur në ndershmërinë e tij dhe të familjes.
“Ishte një persekutim i pashembullt mbi shtatë vjet e dhjetë muaj, i orkestruar nga individë të cilët në pamundësi që të ballafaqohen me argumente politike, me dije punë e angazhim, dhe individë të tjerë që janë të mësuar të ndërtojnë karrierë mbi kurrizin e njerëzve të pafajshëm. Ne patëm një persekutim të pashembullt. Nga një ministër të suksesshëm më paraqitën si njeriun më të urryer të këtij vendi”, tha Limaj në konferencë pa treguar armiqtë e tij që synuan ta qojnë prapa grilave.
Kreu i NISMA-s, në mbrëmje u paraqit në një rrëfim në Klan Kosova ku foli për lojën që ju luajt pas, ku armiqtë e tij nuk ja kursyen as familjen vetëm e vetëm që ta mposhtin.
Limaj edhe pse nuk përmendi ndonjë emër të vendorëve, qartazi la të kuptohet se ata që dëshiruan ta fundosin janë brenda institucioneve, për çka ju shpalli luftë se do bëjë çmos që t’i ndalë në mënyrë që të mos ju bëjnë padrejtësi qytetarëve të tjerë.
“Përkushtimi dhe angazhimi im është fuqishëm me i ndalë padrejtësitë, me kriju siguri juridike, njerëzit e ligë me i largu prej institucioneve, njerëzit e mbrapshtë që punojnë ditë e natë me shkatërru njerëz duhet me i largu prej këtyre institucioneve kudo që të jenë ata, me ju ngushtu hapësira. Boll mo!. Unë mundem me marrë me mend çka ju bëjnë njerëzve të tjerë që në emër të ligjit rrënojnë njerëz”, tha Limaj.
Dhe kreu i NISMA-s duke mos dhënë asnjë detaj të vetëm se kush janë njerëzit e ligë, kush punon ditë e natë për të shkatërru njerëz, dhe kush janë që duhet t’i ngushtohet hapësira la pas shumë pikëpyetje që sigurisht Limaj do i jepte më së miri zgjidhje.
Pas këtij mesazhi të Limajt, qytetarët kanë të drejtë të dijnë se kush janë ata politikanë që paguhen me taksa të qytetarëve dhe kanë mision shkatërrimin e njerëzve, në mënyrë që t’i ndëshkojnë me votë në zgjedhjet e ardhshme dhe mos kenë mundësi të bëjnë veprime të njëjta.
Përfundimisht mund të thuhet se Limaj ka fituar betejën ndaj armiqve të tij, por për t’ua treguar derën jashtë institucioneve i duhet ndihma e qytetarëve, andaj kjo ndodhë më lehtë nëse këta të fundit e dijnë se kush janë njerëzit e ligë brenda institucioneve që shkatërrojnë njerëz. /tesheshi.com/
