Korrupsioni në universitete është një “plagë” e vjetër e shoqërisë shqiptare. Pavarësisht arrestimeve të herë pas hershme, ajo vazhdon të mbetet e hapur dhe e “pakuruar”. Rasti i fundit është ai i ditës së sotme (e hënë) në universitetin e Shkodrës, “Luigj Gurakuqi”.
Prokuroria zbuloi se disa shefa departamentesh dhe studentë të Fakultetit Filologjik, nëpërmjet disa personave që kryenin rolin e sekserëve kanë krijuar një skemë korrupsioni në dhënien e provimeve, në vlera monetare që varionin nga 200- 700 euro.
Ata bashkëpunonin me njëri-tjetrin, për të ndihmuar studentë të ndryshëm, në këmbim të parave, që të merrnin provimet, kryesisht në degën e historisë.
Prokuroria e Shkodrës ka arritur të zbulojë se zv.Dekani i Fakultetit të Filologjisë, Rokin Dabërdaku dhe shefi i Katedrës së Historisë, Simon Lufi nëpërmjet sekserëve Vehbi Bala dhe Ndoc Deda kanë marrë para nga studentë të ndryshëm. Në këmbim, pedagogët u kanë siguruar studentëve nota kaluese në provime të ndryshme ose vlerësime të larta, të cilat më pas do të shërbenin për regjistrimin në master.
Në bazë të veprimeve të deritanishme hetimore, gjykata e Shkodrës pranoi kërkesën e Prokurorisë dhe vendosi masën e sigurisë “arrest në burg” për dy pedagogët të dyshuar për “korrupsion pasiv”, Vehbi Bala dhe Ndoc Deda, të dy në rolin e sekserit, të dyshuar për “Ushtrim ndikimit të paligjshëm”, si dhe Brunilda Allushi, Vehbi Allushi, Renato Trushi dhe Arsen Lekaj, të dyshuar për “Korrupsion aktiv” /tesheshi.com
