Nga Blendi Gashi
11-vjetori i vdekjes së ish-presidentit Ibrahim Rugova ka vënë në pah inatet dhe përçarjet e thella që vazhdojnë të jenë prezente në Lidhjen Demokratike të Kosovës që nga vdekja e liderit historik.
Ndonëse partia që aktualisht drejtohet nga Isa Mustafa thotë se është unike, një gjë e kundërt u dëshmua hiç më larg se dje me organizimin e dy akademive përkujtimore, njëra në Prishtinë e tjetra në Gjilan.
Dhe protagonistët e përçarjes janë dy nënkryetarët e këtij subjekti, Agim Veliu e Lutfi Haziri, që njëherit janë rivalët më të mëdhenj për të pasuar Mustafën në krye të LDK-së.
Mungesa e Mustafës në përvjetorin e 11-të dhe lënia e “kryetarllëkut”, Veliut i cili zuri vendin e kreut të partisë pranë gruas së Rugovës dhe mori fjalën kryesore në akademinë e Prishtinës, siç duket ka nervozuar tej mase Hazirin i cili braktisi këtë akademi dhe organizoi një të tillë në qytetin që udhëheq, në Gjilan, në kuadër të manifestimit mbarëkombëtar “Flaka e Janarit 2017”.
Ndërsa në akademinë në Prishtinë morën pjesë figurat më të larta të LDK-së si ministra e deputetë, në Gjilan nuk u panë të tillët, përjashto ministrat Arban Abrashi dhe Imet Rrahmani, ndërkohë që familjarët e Rugovës morën pjesë në të dy akademitë.
Padyshim se Haziri, me organizimin e bërë ka dashur t’ia bëj me dije Veliut se do ta ketë përballë dhe rivalin më të madh për kreun e partisë pasi Mustafa ta përfundon mandatin.
Duke parë rivalitetin në rritje Veliu-Haziri, dhe duke mos harruar në asnjë moment rivalitetin, Sejdiu-Daci, që çoi në kërsitjen e grushteve mes zyrtarëve të LDK-së, në Kuvendin e pestë që njihet si “Kuvendi i karrigeve”, shtrohet pyetja se a po ecet sërish drejt një përplasje të tillë?
Padyshim se prishja e koalicionit qeverisës dhe rënia e Mustafës, pra humbja e pozitës së kryeministrit, do sjellë zhvillime zhvillime të reja në LDK, ku pritet të pasojë një garë e fortë për të marrë kreun e partisë.
Përveç Hazirit e Veliut, në garë pritet të jenë edhe sot dy kundërshtarët më të ashpër jo vetëm të Mustafës por edhe organeve drejtuese, pra Vjosa Osmani dhe Fatmir Sejdiu.
Më 31 maj të vitit 2015, LDK mbajti Kuvendin zgjedhor ku Isa Mustafa u rizgjodh edhe për një mandat kryetar.
Por, edhe pse mori shumicën e votave të delegatëve, ngase votimi u bë me aklamacion, ky Kuvend u përshkua me shumë pakënaqësi nga një grup i delegatëve të prirë nga Fatmir Sejdiu.
Edhe pse kishte paralajmëruar kandidaturën, Vjosa Osmani nuk arriti të përballet me Mustafën, pasi nuk mori votat e nevojshme të delegatëve që t’i hyjë garës. /tesheshi.com/
