Yusra Mardini 18 vjeçare, kampione e notit në Siri do të jetë një prej 10 lojtarëve olimpik, të cilët si refugjatë do të garojnë në Lojërat Ndërkombëtare Olimpike që do të mbahen në Rio.
Sikurse qindra e mijëra sirianë tjerë, të cilët po ikin nga flakët e luftës në Siri, edhe Yusra bashkë me motrën e saj Sarën po sfidonte detin Mesdhe në përpjekje për të gjetur një jetë më të sigurt në ndonjë prej vendeve të Evropës.
Përkundër shumë emigrantëve të tjerë, të cilët nuk kishin fatin t’i mbijetojnë këtij udhëtimi të kobshëm, falë shkathtësive të saj në not ajo arriti t’i shpëtojë vdekjes së sigurt në det për të arritur në brigjet e një ishulli grek, prej nga ku më pas mbërriti në Gjermani, ku edhe jeton prej një viti.
Sot, Yusra është përzgjedhur ndër 10 atletët refugjatë nga mbarë bota që do të konkurrojnë në Lojërat Olimpike të Rios.
Ajo thotë se “kjo mundësi për të marrë pjesë në lojërat olimpike ofrohet një herë në jetë”, andaj ajo është e përkushtuar që me punë të palodhshme të realizojë ëndrrën e saj.
“Dëshiroj që refugjatët të ndihen krenar me mua. Dëshiroj t’i inkurajoj ata”, thotë ajo.
Për herë të parë, Komiteti Olimpik Ndërkombëtar ka marrë vendim që edhe refugjatëve t’u mundësohet pjesëmarrja në garat olimpike, nën flamurin dhe himnin olimpik.
Krahas Yusras, edhe nëntë refugjatë tjerë do të garojnë në Lojërat Olimpike, e këta janë:
Rami Anis, është notuesja më e shpejtë e Sirisë në 100-metra, flutur. Pesë vite pas ikjes nga Siria, 25 vjeçarja sot jeton në Ghent të Belgjikës.
Anjelina Lohalith, një 21 vjeçare nga Sudani jugor, e cila ka ikur para 8 viteve garon në vrapim 1,500 metra.
Popole Misenga dhe Yolande Mabika, të dyja nga Republika Demokratike e Kongos, janë xhudiste që garojnë në kategorinë 90 kg, respektivisht 78 kg.
Yonas Kinde, 36 vjeçar nga Etiopia është vrapues maratone. Është larguar nga vendi i tij në vitin 2012 dhe tani jeton në Luksemburg.
James Nyang Chiengjiek, nga Sudani jugor, garon në vrapim në stazën 400 metra. Chiengjiek, 28 vjeçar ka ikur nga vendi i tij dhe tash jeton në kampin e refugjatëve Kakuma, në Kenia.
Rose Nathike Lokonyen, nga Sudani jugor garon në vrapim 800 metra. Ka ikur para 14 vjetësh dhe sot jeton në kampin Kakuma në Kenia.
Paul Amotun Lokoro, nga Sudani jugor, garon në vrapim 1,500 metra. 24 vjeçari ka ikur nga vendi i tij para 10 viteve. Jeton në kampin Kakuma, në Kenia.
Yiech Pur Biel, nga Sudani jugor, vrapon në 800 metra. Ka lëshuar vendin në vendin 2005, prej atëherë jeton në Kakuma të Kenias.
/tesheshi.com/
