Nga redaksia
Popullata serbe e veriut të Kosovës është e frikësuar nga kriminelët serbë, siç i quajnë ata “Klani i ri i Zemunit”, e jo nga të ashtëquajturit ekstremistë shqiptarë.
Kjo bëhet me dije nga një letër që një grup intelektualësh serbë të Veriut i kanë përcjellë kryeministrit Aleksandar Vuçiç, edhe me bindjen se kriminelët serbë që veprojnë në Veri, kanë përkrahjen e tij e të Beogradit. Kjo letër është siguruar në mënyrë kofidenciale nga portali tesheshi.com.
Veç kësaj, sipas letrës, kryeministri Vuçiç ka të emëruarin e tij të posaçëm për prishjen dhe moslejim të zbatimit të marrëveshjeve të Brukselit.
Letra nga ana e saj, është nënshkruar si nga zyrtarë të ndryshëm, ashtu dhe nga disa profesorë të Universitetit serb të Mitrovicës.
Ndër të tjera aty thuhet se “politikën në veri të Kosovës, janë duke e udhëhequr analfabetët dhe kriminelët nëpërmjet terrorit dhe frikës, e që në radarin e tyre janë të gjithë ata që kanë guxim t`i kundërvihen këtij grupi kriminal”.
Dhe letra përmend emër për emër disa prej tyre, ku shprehimisht thuhet se në këtë grup bëjnë pjesë: Zvonko Veselinoviç nga fshati Dolane, Ljubomir Mariç, polic i pensionuar nga Beogradi, Zllata Radovanoviç nga Beogradi, Aleksandar Spiriç dhe Zoran Milojeviç, i njohur me nofkën Zhela nga Leposaviqi.
“Këta janë sunduesit e veriut të Kosovës, ndërsa kryetarët e komunave të Veriut janë vetëm marioneta të tyre, të cilët pa asnjë kundërshtim vetëm zbatojnë urdhërat e këtyre kriminelëve të përmendura”, thuhet në letrën e serbëve të Kosovës drejtuar Vuçiçit.
“Ju i nderuari kryeministër keni formuar një grup të ri kriminal i ngjashëm me atë të “Klanit të Zemunit”, nga njerëz të gjysmëanalfabet dhe kriminelë që janë edhe bosë të narko-dilerëve (dollarëve), si dhe bashkëpunëtorë të shumë shërbimeve të huaja”, thuhet në letër.
Dhe më pas, në letër ka vend për t`u cituar dhe shqiptarët. “Serbët sot kanë më shumë frikë nga këto banda dhe grupe kriminale serbe, se sa nga sulmet e ekstremisteve shqiptarë, siç thoni ju nga jugu.”
Letra vijon: “E tëra kjo ka filluar me sjelljen këtu të gjysmë analfabetes Zllata Radovanoviç e cila ka mbaruar shkollën e tekstilit, e ju kryeministër e keni caktuar si koordinatore dhe këshilltare të 4 kryetarëve të Komunave të veriut të Kosovës. Radovanoviç sot informon kryeministrin serb për të gjitha marrëveshjet që bëhen pa dijeninë e saj me Prishtinën, nga kushdo qoftë nga politikanët serbë nga Veriu, e më pas pastaj këta njerëz apo politikanë janë edhe caku i sulmeve dhe frikësimit nga ana e grupit kriminal të përmendur. Së bashku me Radovanoviçin, në Mitrovicë ka ardhur edhe polici që ka të kryer vetëm shkollën e mesme, Marko Knezheviç, e që në qytet e thërrasin shoku i zi, ‘drug Crni’. Knezheviç, është angazhuar që të njoftoj juve për të gjitha aktivitetet e policëve serbë që janë duke punuar në kuadër të Policisë së Kosovës. Por përveç përcjelljes së punës së policisë së Kosovës, Marko Knezheviç përcjell, monitoron si dhe censuron punën e medieve dhe gazetarëve që raportojnë nga Kosova”.
Knezheviç, siç thuhet në letër, ditë dhe natë monitoron televizionin ‘Tv Most’ nga Zveçani, të cilin e financon qeveria e Serbisë dhe urdhëron se çka duhet të lëshohet në opinion e çka jo.
“Qeveria iu ka siguruar banesën në Mitrovicë, ku jetojnë Zllata Radovanoviç dhe Marko Knexheviç, dhe për këtë banesë ata paguajnë hiç më pak se 800 euro në muaj për qira. Kjo është një plaçkitje e hapur e parasë të buxhetit të shtetit të Serbisë”, thuhet në letër drejtuar të parit të qeverisë së Beogradit, Aleksandar Vuçiç.
Lubomir Mariç, një ish-bukepjekës, emisari i Aleksandar Vuçiçit për prishjen e marrëveshjeve të Brukselit
Letra e zyrtarëve dhe e profesorëve serbë ka dhe më. Aty denoncohet një emër, Lubomir Mariç, si njeriu që ka një mision të caktuar të marrë nga Beogradi: prishjen e marrëvëshjeve që nënshkruhen në Bruksel.
“Si person që është i angazhuar nga ana e kryeministrit serb Vuçiç, për të minuar të gjitha marrëveshjet që janë arritur në Bruksel, është ministri i qeverisë së Kosovës, Lubomir Mariç. Lubomir Mariç, është një refugjat nga Kroacia, pra nga qyteti i Kninit, nuk është fare nga Kosova, dhe ka vetëm zanatin e bukëpjekësit”, thuhet në letër.
Sipas asaj çka shkruhet më tej, ministri Mariç, para disa viteve është kuruar në spitalin psikiatrik tek doktori Laza Llazareviç, e tani është ministër në qeverinë e Prishtinës; ndërsa për këshilltar të tij është emëruar Darko Radovanoviç, i cili për tri vite i ka ndërruar pesë parti.
Me tej në letër thuhet se: “si kriminel që udhëheq veriun e Kosovës është edhe
i cili është udhëheqës i organit të përkohshëm të Komunës së Mitrovicës së veriut, i caktuar nga qeveria e Beogradit”. Spiriç, thuhet në letër se nuk është serb, por rom dhe është pronar i televizionit lokal ‘DanKos’ nga Mitrovica.
“Spiriç me krimin merret në dy mënyra: Duke derdhur qindra e mijra euro na llogari të firmave serbe në veri të Mitrovicës e të cilat pastaj reklamojnë në televizionin e tij, ndërsa afërsi të magjistrales Mitrovicë- Zubin Potok, në vendin e quajtur ‘kozarckjo reci’, është duke ndërtuar vilë mbretërore në vlerë prej mbi gjysmë milion euro”, i qajnë pra hallin serbët e Kosovës, kryeministrit të Serbisë.
Sipas letrës, në Leposaviq është duke udhëhequr gjysmëanalfabeti Zoran Milojeviç, i njohur me nofkën ‘Zhela’, i cili ka të kryer shkollën e mesme të makinerisë dhe para lufte ka punuar si punëtor i thjeshtë në një pikë të karburanteve të kompanisë INA nga Zagrebi në Zubin Potok, e pas lufte, me paratë e shqiptarëve ka ndërtuar pikën e karburanteve private të tij ‘MSN-Petrol’ në Leposaviq.
“Milojeviçi, djali i tij Marko, i cilit për kontrabandë me drogë është duke vuajtur dënimin me burg në Nish, tani është këshilltar kryesor i Marko Gjuriçit, drejtorit të Zyrës për Kosovën të Qeverisë së Serbisë”, thuhet në letër.
Biznesmeni Zvonko Veselinioviçi, “dora e fortë” e Aleksandar Vuçiçit
“Megjithatë, dora dhe forca kryesore e këtij grupi kriminal në veriun e Mitrovicës dhe Kosovës është Zvonko Veselinoviç, të cilit tani i është dhënë një emërtimi i ri si biznesmeni i Aleksandar Vuçiçit”, thuhet në letër, ku vijohet: “Veseliniviç, është personi i cili pyetet për të gjitha punët në veriun e Mitrovicës dhe Kosovës, ndërsa tani dora e djathtë e tij për Veriun është vjehri i tij, Neshko Milinoviç. Neshko Milinoviç dekan i shkollës së lartë në Leposaviç, në këtë funksion e e ka emëruar personalisht Veselinoviçi”.
Njeriu që që e ka përcjellë ketë letër tek redaksia e tesheshi.com, me kusht të anonimitetit, shprehet se gjatë vizitës që kryeministri serb, Aleksandar Vuçiç i ka bërë Tiranës zyrtare, me vete ka pasuar edhe biznesmenin nga Kosova, Znvonko Veselinoviç, e që atje ai është paraqitur si një biznesmen shumë i suksesshëm.
Duhet të përmendim se për Zvonko Veselinoviçin, siç ka raportuar portali tesheshi.com pak ditë më parë, ka një fletëarrest të lëshuar nga Policia e Kosovës dhe EULEX-it, për shumë vepra kriminale të kryera në tërë territorin e Kosovës.
Në letër e intelektualëve serb thuhet se asnjë tender nuk mundet të merree nga ndonjë kompani pa urdhërin e Veselinoviçit.
Momentalisht, firma e tij ‘INKOP’ është duke punuar një rrugë të një lagjeje të vogël në veri të Mitrovicës, e për këtë tender ka marrë 500 mijë euro nga buxheti i shtetit. Zvonko Veselinoviç, së bashku me Millan Radonçiçin, janë duke ndërtuar edhe një objekt banimi katër katesh në Veri, e ku do të banojnë të gjithë biznesmenët kriminelë serbë, pra sikurse ka ndodhur edhe me ‘Klanin e Zemunit’. /tesheshi.com/
