Sulmet ajrore mbi kompleksin shkollor në Has të Idlibit mëngjesin e së mërkurës u përshkruan si bombardimet më të rënda mbi institucionet arsimore që prej fillimit të konfliktit sirian më tepër se pesë vite të shkuara.
Vendasit dhe punonjësit e shpëtimit thanë se së paku qenë vrarë 35 persona, e se ishin 30 të plagosur, por një mjek e deklaroi në më shumë se 100 numrin e të lënduarve.
Sipas tij, teksa ai mjekoi një numër të plagosurish në një spital të zonës, pjesa më e madhe e viktimave ishin fëmijë të moshës nga gjashtë në pesëmbëdhjetë vjeç, si dhe mësuese.
“Nga 120 të plagosurit, kishte rreth 40 fëmijë, dhe 30 deri në 40 gra, e pjesa tjetër ishin të moshave të ndryshme, shumica prindër, që kishin shkuar të shihnin se çfarë kishte ngjarë me fëmijët e tyre… Ishin të gjithë civilë. Nuk kishte as terroristë, as njerëz të armatosur, as luftëtarë,” ka deklaruar mjeku, emri i të cilit nuk bëhet i ditur.
Për sulmin ka reaguar fort drejtori ekzekutiv i UNICEF-it, Anthony Lake, që ka thënë, “Kjo është një tragjedi, është një akt mizor, e nëse i qëllimshëm, është një krim lufte.”
“Kjo mizori e fundit mund të jetë sulmi më vdekjeprurës mbi një shkollë që kur lufta filloi më shumë se pesë vite më parë,” ka shtuar ai.
Përndryshe, një zëdhënëse e Ministrisë së Jashtme të Rusisë u shpreh se vendi i saj nuk kishte të bënte me sulmet. Gënjeshtër i quajti ajo deklarimet se në sulmin vdekjeprurës kishin marrë pjesë avionë luftarakë rusë dhe sirianë.
UNICEF-i ka bërë me dije se ka verifikuar më së paku 38 sulme mbi shkollat në Siri që nga fillimi i këtij viti. /tesheshi.com/
