Edhe një herë tjetër festivali më i madh i muzikës Europiane ka sjellë zhgënjim të thellë në masa të gjera të popullsisë, ku siç po vihet re, gjithçka më shumë duket si votim në bazë të fqinjësisë së mirë dhe gjeopolitikës, e jo në bazë të meritës apo preferencave muzikore, çka lë hapësira të mëdha për të dyshuar në lidhje me numërimin e votave dhe vendimet e jurive të shteteve.
Ai që e fitoi Eurovizionin këtë vit ishte këngëtari Måns Zelmerlöë, përfaqësuesi i Suedisë me këngën “Heroes”, ndërsa në vend të dytë është shpallur Rusia e në vend të tretë Italia.
Vendi ynë u rendit i 16 në këtë kompeticion ndërkohë që pritshmëritë ishin shumë më të larta. I vetmi shtet që Shqipërinë e vlerësoi me pikët maksimale ishte fqinji ynë, Maqedonia, ndërsa Greqia, të cilën ne e vlerësuam me 10 pikë, dha për Elhaidën vetëm 6 pikë.
Ajo çka me të vërtetë habiti dhe ka lënë pa fjalë të gjithë, ka qenë votimi i Italisë kundrejt Shqipërisë. Pse? Arsyeja e thjeshtë. Ne u japim pikët maksimale, ata asnjë gjë, qoftë edhe një pikë. Mos vallë gjithë ata shqiptarë që jetojnë e punojnë prej vitesh në këtë shtet nuk kanë votuar aspak për vendin e tyre? Apo italianët nuk e kanë vlerësuar Elhaidën, vajzën shkodrane e cila këndoi me të famshmin Ricardo Cocciante dhe ishte fituesja e “The Voice of Italy”?
Çfarë të mendojë publiku në të tilla raste? Çfarë fshihet në të vërtetë pas këtij televoimi? E sido që të jetë përgjigja, një gjë është e sigurt: Prezantimi dhe përfaqësimi i Shqipërisë me këngën “I Am Alive”, të këngëtares Elhaida Dani ishte në nivele të kënaqshme dhe aspak nuk mund të themi që linte për të dëshiruar.
Ajo do të vijojë të qëndrojë për një kohë të gjatë në mendjen dhe buzët e të gjithëve, duke qenë se ka rezultuar edhe si një nga këngët më të klikuara në internet. Në rrjete të ndryshme sociale, me të drejtë ka nisur ironia dhe ajo që shikohet e spikat më së shumti është fjalia pyetëse: “Elhaida fitoi ‘Voice of Italy” dhe nuk merr asnjë pikë nga Italia?”. Është pyetja më e drejtë që mund të bëhet, por deri sa ne të gjejmë përgjigjen, presim kthimin e Elhaidës si fituese dhe përfaqësuesen dinjitoze të Shqipërisë në Eurovision Song Contest, pavarësisht renditjes e klasifikimit. /tesheshi.com/
