Një studim i realizuar nga Universiteti i Torontos tregon se zgjimi i shpejtë në mëngjes sjell pasoja pozitive për shëndetin, organizmin dhe humorin.
Dihet që kur keni një zakon të mirë me gjumin, keni më shumë kohë për t’i dedikuar vetes dhe të tjerëve. Niset dita pa nxituar, pa presion, pa stres, ndërsa në të kundërt, ata që zgjohen në orën 10 të mëngjesit dhe më vonë, humbin pjesën më produktive dhe energjike të ditës. Metabolizmi, ndër të tjera, punon më mirë në mëngjes, djeg më shumë kalori dhe ndihmon në mbajtjen e linjave të përsosura trupore.
Drita e diellit ndikon në prodhimin e serotoninës, hormonit të mirëqenies dhe në mënyrë të pandërgjegjshme na bën të jemi njerëz me më shumë energji dhe pozitivitet. Pikërisht kjo është arsyeja se pse aktivitetet që kanë nevojë për vëmendje dhe përqendrim zhvillohen gjatë orëve të mëngjesit, pasi janë më shumë produktive.
Në perëndimin e diellit, kur ka më pak dritë, është mirë që trurin ta impenjoni me gjëra më pak të vështira dhe qetësuese, siç është leximi i një libri, dëgjimi i muzikës apo parja e një filmi.
Sekreti për të shijuar 100% pushimin dhe për t’u zgjuar herët me qetësi, është të ndiqni një rutinë precize në mbrëmje dhe veçanërisht të fikni televizorin, celularin dhe kompjuterin. Vetëm pas një gjumi të qetë do të mund të nisni një ditë të re me buzëqeshje. Ia vlen ta bëni këtë provë. /tesheshi.com/
