Kryetari i Prishtinës, Shpend Ahmeti, i ka drejtuar një mesazh qytetërëve që të mos e marrin me shaka votën në zgjedhjet vendore.
Ahmeti ka reaguar pas humorit që kanë shkaktuar në rrjetet sociale shumë nga kandidatët për asambletë komunale.
“Këto ditë lexova shumë statuse me humor për kandidatët e asambleve. E pranoj, disa prej këtyre janë shumë të mira dhe po i shpërndajmë edhe në rrjete sociale. Me 7 mijë kandidatë për zgjedhjet komunale është vështirë të shmangësh ofertat nga rrjetet sociale apo portalet. Besa edhe në rrugë e njëjta gjë.
Krejt në rregull, por kisha një lutje si qytetar që edhe votën mos ta merrni me humor. Kuvendi Komunal vendos shumë për jetën tone, madje për gjëra më të rëndësishme për jetën tonë se sa pushteti qendror. Asambleistët vendosin për planet rregullative e për pronën tonë, për buxhetin se ku shpenzohen paratë tona, për tatimin në pronë që e paguajmë, për çdo rregullore e deri te tarifat për çertifikata.
Mund të qeshim me numrin e kandidatëve, ofertat e disa prej tyre por assesi për votën. Është shumë me rëndësi për jetën tonë”, shkruan Shpend Ahmeti. /tesheshi.com/
