I parë fillimisht si kandidati më i mundshëm për t’i fituar zgjedhjet e ardhshme presidenciale në Francë, Francois Fillon vazhdon të humbasë terren për shkak të skandaleve rreth tij.
Një anketim i fundit, rezultatet e të cilit janë bërë të njohura sot, tregon se në ç’gjëndje është katandisur kandidati konservator, teksa tre të katërtat e votuesve francezë kërkojnë tërheqjen e tij nga gara.
Sipas anketimit, gati nëntë votues në dhjetë të tillë mendojnë se Francois Fillon nuk tregohet i ndershëm, e tre të katërtat e votuesve shprehen se ai nuk është as bindës, as është pranë shqetësimeve të tyre.
Fillon pritet që të eliminohet në raundin e parë të zgjedhjeve presidenciale më 23 prill, duke ua lënë fushën e betejës centristit Emmanuel Macron dhe ekstremistes së djathtë Marine Le Pen.
Kandidati konservator është nën hetim për shpërdorim të fondeve publike, për pagim të mijëra eurove për familjarët e tij për punë të sajuara e të pabëra asnjëherë.
Anketimi për llogari të radios France Info u krye në dy ditët e shkuara, dhe është në vazhdën e sondazheve të ngjashme me të njëjtin përfundim. /tesheshi.com/
