Kryetari i partisë Demokratike, Lulzim Basha sulmoi nga çadra e protestës ministrin e ri të Brendshëm, të caktuar nga kryeministri Rama në vend të Saimir Tahirit. Fatmir Xhafaj pritet të shkojë në krye të ministrisë së Brendshme pas ndryshimeve në qeveri, që u hodhën poshtë nga opozita si faktor i mundshëm i daljes nga kriza.
Sipas Bashës, Xhafaj duhet të tërhiqet dhe se nuk do të lejohet të qëndrojë asnjë minutë ministër i Brendshëm. Komentet u bënë në një takim me një grup ish-të përndjekurish, ku Basha e cilësoi Xhafajn, një pasardhës të komunizmit i cili ka lyer duart me gjakun e shqiptarëve të pafajshëm.
“Sakrifica e një populli të tërë për ata mijëra të rinj dhe të reja të klonuar në kufijtë e Shqipërisë që ndiqnin ëndrrën e lirisë që gjendej jashtë diktaturës, rrezikon të përdhoset nga një kryeministër nip i Byrosë Politike të Enver Hoxhës, i cili nuk u mjaftua me gjëmën e kriminalizimit dhe drogës, por ka vendosur t’i propozojë shqiptarëve për ministër të Brendshëm, një nga hetuesit më famkeq të diktaturës së Enver Hoxhës, një njeri që ka torturuar me duart e tij djem dhe vajza të Krujës, një njeri që pasi hoqi kostumin e hetuesisë veshi bashkë me vëllain e tij kostumin e narkotrafikantit, ky është Fatmir Xhafaj”, ishte portretizmi i kreut të demokratëve për Xhafajn.
Basha tha se e vetmja rrugë për t’i hapur Shqipërisë perspektivën europiane është largimi i Ramës, qeveria teknike me mbështetje të gjerë politike pa persona të përlyer me krimin dhe pa persona që kanë përlyer duart me gjakun e shqiptarëve të pafajshëm gjatë diktaturës komuniste. /tesheshi.com/
