Ndërkohë që janë numëruar 90 për qind e votave të zgjedhjeve parlamentare në Marok, rezultati zgjedhor nxjerr në vend të parë Partinë për Drejtësi dhe Zhvillim (PJD).
Numri i vendeve që kjo parti ka siguruar në parlamentin e ri është 99, duke lënë pas Partinë e Autenticitetit dhe Modernitetit, që arriti të merrte 80 vende. Në vend të tretë janë konservatorët e Istiklal-it, me 31 vende në parlament.
Partia për Drejtësi dhe Zhvillim, e drejtuar nga kryeministri Abdelilah Benkirane, ka udhëhequr një koalicion të gjerë që prej zgjedhjeve të pesë viteve më parë, kur doli partia e parë në vend.
PJD-ja ka premtuar se mandati i dytë do t’i japë mundësi të vijojë me reformat ekonomike dhe sociale, edhe pse opozitarët e kritikojnë atë për mungesë të rezultateve të prekshme gjatë pesë viteve në pushtet.
Sipas asaj çfarë parashikon kushtetuta e vitit 2011, kryeministri zgjidhet nga partia që ka marrë më shumë vota në zgjedhje. Mbreti Muhammedi VI do t’ia njohë me shumë mundësi PJD-së të drejtën për formimin e një qeverie të re, në një mandat të dytë për të. /tesheshi.com/
