Zgjedhjet e 11 dhjetorit në Maqedoni kanë rrëmbyer, siç thuhet “të madh e të vogël në këtë vend”. Dhe nuk kanë mbetur pas në pronopncime edhe figura fetare, sidomos klerikë muslimanë, që në shoqërinë e shqiptarëve të Maqedonisë gëzojnë një status të veçantë dhe janë prej atyre që “u dëgjohet fjala”. Ata jo vetëm kanë vlerësuar rëndësinë e këtyre zgjedhjeve për të ardhmen e vendit, por dhe kanë paralajmëruar bashkëkombasit që të mos e shesin votën. Një i tillë është së fundi dhe kryetari i Shoqatës Humanitare “Merhamet”, Ridvan Xhaferi. Ai nuk ngurruar ta konsiderojë tradhëti ndaj Zotit, vendit dhe popullit aktin e shitjes së votës, e padyshim dhe blerjes së saj.
Ja dhe statusi i plotë i hoxhës:
“BLERJA E VOTAVE ËSHTË TRADHTI NDAJ ALLAHUT TË MADHËRUAR DHE NJERËZIMIT
Siç e dimë të gjithë se vendi ynë këto ditë është duke i përjetuar zgjedhjet parlamentare të cilat përcaktojnë të ardhmen politike dhe të ardhmen jetësore. Por, vërejmë se siç afrohet koha e ditës së zgjedhjeve njashtu është duke u përhapur shtrembërimi i njollosur në mesin e njerëzve, ajo të përdorimit të parave për blerje të votave.
Ata të cilët përdorin paratë për blerje të votave le ta dinë se shtrembërojnë dhe njollosin personalitetin e njeriut, dinjitetin dhe lirinë e tij. Këta shesin dhe blejnë interesin e vendit dhe të popullit. Le ta dinë këta se ligji Islam këta njerëz i llogarit TRADHTARË, që tradhtojnë Allahun, popullin dhe vendin. Jo që nuk duhet tu shkohet për shtati këtyre njerëzve tradhtarë, por doemos të ndëshkohen në jetën e përditshme. Kërkojmë që shoqëria ti dënojë rreptë këta pushtetarë me 11 Dhjetorë. Kjo sjellje e turpshme dhe e shëmtuar është në rritje e sipër, blerja e votës llogaritet ryshfet dhe myslimanët e dinë shumë mirë se ryshfeti (korrupsioni) në Islam është haram (i ndaluar rreptësishtë), është zjarr që e ha njeriu e që e fut në barkun e tij (familjen e tij). Myslimanët e dinë se në bazë të thënieve Pejgamberike ai që korrupton dhe i korruptuari janë në zjarr, të mallkuar dhe të larguar nga mëshira e Allahut.
Të vetëdijesohemi o popull për një ardhmëri më të mirë, të mirën e vetes, fëmijëve, familjes, shoqërisë dhe vendit. Këtë e kemi AMANET nga Allahu i Madhëruar dhe le ta çojmë amanetin në vendin e duhur.
“Ndihmoni njëri-tjetrit në punë të mira dhe në të ruajturit nga të këqijat, dhe mos ndihmoni në mëkate dhe armiqësi!” (Maide: 2)”, ka shkruar hoxha nga Shkupi, Ridvan Xhaferi. /tesheshi.com/
