Presidenti ukrainas Volodymyr Zelensky iu drejtua kombit mbrëmë vonë, duke thënë se është e vështirë të parashikohet se sa do të zgjasë lufta.
“Sigurisht që dëgjoj edhe parashikime të ndryshme. Kam shumë më tepër informacion për qëllimet dhe aftësitë e ushtrisë ruse sesa disa media. Për potencialin e ekonomisë ruse, por edhe gjendjen emocionale të shoqërisë ruse”, tha ai.
Ai tha se dy faktorë do të vendosin se sa do të zgjasë lufta: “Suksesi i ushtrisë sonë në fushën e betejës është shumë domethënës, historikisht i rëndësishëm. Por nuk mjafton për të pastruar vendin tonë nga pushtuesit. Ne ende duhet t’i mundim ata,” tha Zelenski.
“Sanksionet kundër Rusisë janë gjithashtu shumë të rëndësishme, të dhimbshme ekonomikisht, por ende të pamjaftueshme për ta lënë makinën ruse të luftës pa burime. Ne do të kërkojmë sanksione edhe më të forta dhe më shkatërruese,” tha Zelensky.
“Nëse dikush thotë se lufta do të zgjasë me vite e vite, unë përgjigjem: Ju mund ta bëni luftën të zgjasë shumë më pak”, tha Zelensky, duke patur parasysh me këtë disa vende perëndimore, të cilat vijojnë të furnizohen me naftë dhe gaz rus, ku veçon Gjermania. Presidenti ukrainës kërkon pikërisht këtë: që ato, me dhimbje sigurisht, të marrin vendimin për ta ndëprerë këtë furnizim, që sipas tij do çonte në shterim të të ardhurave financiare ruse.
Që nga fillimi i pushtimit rus të Ukrainës, janë vrarë nga 2,500 deri në 3,000 ushtarë ukrainas, tha Zelensky në një intervistë për CNN.
Ai shtoi se kishte dhe rreth 10,000 ushtarë ukrainas të plagosur, ndërsa nuk ka të dhëna për numrin e viktimave civile.
Ai theksoi se humbjet ushtarake ruse ishin shumë më të mëdha dhe se 19-20 mijë ushtarë rusë u vranë. Moska njoftoi muajin e kaluar se 1,351 ushtarë rusë ishin vrarë dhe 3,825 ishin plagosur.
Zelenski e përshkroi situatën ushtarake në jug dhe lindje të vendit si “ende shumë të vështirë”, duke vlerësuar forcat e tij të armatosura. /tesheshi.com/
