Mbetjet e një xhamie antike, që besohet se datojnë në dekadat më të hershme të Islamit, janë zbuluar në qytetin verior izraelit të Tiberias, thanë arkeologët.
Themelet e xhamisë, të cilat u gërmuan jo shumë larg Detit të Galilesë nga studiuesit në Universitetin Hebraik të Jeruzalemit, tregojnë se ajo u ndërtua rreth një brez pas vdekjes së Profetit Muhamed, duke e bërë atë një nga vendet e shenjta më të vjetra muslimane për t’u studiuar.
“Ne dimë për shumë xhami të vjetra që u gjetën në fillim të periudhës islame”, thotë udhëheqësja e ekspeditës Katia Cytryn-Silverman.
Sipas saj, xhami të tjera që datojnë nga e njëjta periudhë, të tilla si Xhamia e Profetit në Medine, Xhamia e Madhe në Damask ose Al-Aqsa në Jeruzalem, janë ende në përdorim dhe arkeologët nuk mund t’i studiojnë ato.
Dekada nën sundimin musliman
Cytryn-Silverman shprehet se zbulimi i xhamive në Tiberias ofron një mundësi të rrallë për të eksploruar arkitekturën e ndërtesave të lutjeve muslimane në fillim të zhvillimit të tyre dhe tregon për tolerancën e udhëheqësve të hershëm muslimanë ndaj feve të tjera.
Në kohën kur u ndërtua xhamia, rreth vitit 670, Tiberias kishte qenë nën sundimin musliman për disa dekada.
Nën sundimin musliman, ajo u bë kryeqyteti i provincës në perandorinë e hershme islame, por deri vonë ishte e njohur pak për të kaluarën e hershme muslimane të qytetit. /tesheshi.com/
