Shefja e diplomacisë evropiane, Frederica Mogherini, llogarit që Kuvendi i Kosovës do të ketë shumicën e nevojshme për të miratuar themelimin e Gjykatës Speciale.
“Llogaris që Kuvendi të ketë 2/3 e votave, sepse së pari kjo është në vijë me zotimet e vitit të kaluar, dhe një mënyrë e mirë për të ecur përpara”, ka thënë Mogherini, në konferencën e përbashkët për shtyp me kryeministrin e Kosovës, Isa Mustafa, pas takimit që kanë pasur në zyrën e këtij të fundit në Prishtinë.
“Do të doja që kjo të ndodhë”, ka thënë më tej Mogherini. E para e diplomacisë evropiane dhe drejtuesja e dialogut Kosovë – Serbi në Bruksel ka thënë se energjia do të përqendrohet edhe në implementimin e marrëveshjeve të arritura, por edhe në diskutimin për marrëveshje të reja, përcjell koha.net.
“Megjithatë disa pjesë të marrëveshjeve të kaluara janë duke u zbatuar, dhe kjo nuk mund të neglizhohet. Natyrisht se nuk është arritur gjithçka, por jam shumë optimiste për dialogun”, ka thënë Mogherini, kur është pyetur në lidhje me disa deklarata në Prishtinë se është i panevojshëm vazhdimi i dialogut me hapjen e temave të reja, derisa nuk janë implementuar marrëveshjet e arritura deri më tash.
E pyetur nga gazetari i Kohës Ditore, nëse njohja reciproke në mes të Serbisë dhe Kosovës do të jetë kusht i finales së dialogut të ndërsjellë dhe kusht për integrim të dy vendeve në Bashkimin Evropian, kryediplomatja evropiane nuk ka pasur përgjigje direkte, por e ka lidhur me frymën integruese të vendeve të Evropës, përcjell koha.net.
“Kur jemi te kushti, kushtet për integrim në BE më shumë se çështje burokratike është çështje politike. BE është bashkim i vendeve që për shekuj kanë luftuar mes vete”, ka thënë Mogehrini.
“Takimi i djeshëm i ministrave të jashtëm ka treguar se ka vend për bashkëpunim. Ndërkohë në Bruksel, kam parë dy kryeministrat duke u takuar më 9 shkurt, duke punuar së bashku, diferencat dhe vështirësitë janë evidente. Mirëpo e shoh pozitiv dialogun”.
