Që i ndjeri Ibrahim Rugova të ishte konvertuar në katolik, kjo përflitej prej kohësh nën zë, por që në fakt nuk u sqarua publikisht as nga familja por as nga autoritetet e Kishës Katolike të Kosovës.
Dhe Edi Rama, i deklaruar katolik (ndikimi i gjyshes me të cilën u rrit), në një dedikim që i ka kushtuar presidentit historik të Kosovës, përmend jo vetëm konvertimin katolik të Rugovës, por edhe emrin që ai ka zgjedhur në religjionin e ri që është Pjetër.
Ja ç’shkruan Rama në rubrikën Armacord në Facebook në një dedikim me rastin e ditëlindjes së të ndjerit Rugova:
“Në 72 vjetorin e lindjes së tij, Heroi i Kosovës, Ibrahim Rugova, mund të përkujtohej me një mori fotosh apo klishe që shfaqin burrin e madh të Kosovës, kërkuesin e paepur gandian të mëvetësimit të Kosovës.
Mbase, po kjo është veç një hamendje, i madhi Ibrahim Rugova do të kishte dashur të mbetej në kujtesë parësisht si publicisti i palodhur, njohësi i thellë e i pazëvendësueshëm i letërsisë së hershme shqipe në përgjithësi dhe kontributit të Bogdanit në veçanti, emrin e lindjes së të cilit, Pjetër, e përvetësoi si emrin e tij të amshimit.
Ibrahim Rugova mbetet një “pjetër”- gur këndor, në ndërtimin e Kosovës së lirë, të pavarur mbi rrënjët e saj humaniste dhe shpirtërore.
I paharruar kujtimi!”
Pra, për herë të parë kemi një afirmim publik të faktit që i ndjeri Ibrahim Rugova, presidenti historik i Kosovës, ka zgjedhur të kalojë në botën tjetër jo si Ibrahim (as si Abraham – versioni i krishtero-latin i emrit që kishte), por si Pjetër. /tesheshi.com/
/tesheshi.com/
