Në fushatën elektorale të saponisur në Maqedoni, kanë nisur të grejnë krye dhe premtimet e bujshme. Kështu, në një takim me përfaqësues të Odës Skonomike të Maqedonisë Veriperëndimore (OEMVP), lideri i opozitës Zoran Zaev ka deklaruar se institucionet në nivel lokal dhe qendror u kanë borxh kompanive rreth 1 miliard euro.
Dhe kjo ka çuar që ai të bëjë një premtim alla Rama, se me ardhjen në pushtet do jua shlyejë atë; pra ngjashëm si lideri i së ashtëquajturës Rilindje në Shqipëri, që tashmë, 3 vjet pas ardhjes në pushtet pretendon se e ka mbajtur atë. Por Zaev tha se shlyerja e borxhit nuk do të ndodhë në formë klasike; pra jo me para në dorë por duke iu mundësuar atyre benefice tjera.
“Një prej gjërave që do ta bëjmë në kohë është kthimi i borxheve të grumbulluara me muaj të tërë. Por ju në vend të parave do të merrni kontrolle në zonat e lira ekonomike”, theksoi Zaev.
Dhe, në pyetjen e gazetarëve lidhur me subvencionet që i marrin kompanitë e huaja në zonat e lira ekonomike, pra ato që sundojnë në këto zona, Zaev tha se ata marrin prej 3 deri 8 mijë euro subvencione për punëtor, gjë që sipas tij dëmton kompanitë vendase.
“Subvencionet që u jepen kompanive të huaja, kompanitë vendore i vendosin në pozitë të palakmueshme. Njëkohësisht u mundësohet t’i thithin resurset nga kompanitë e vendit gjegjësisht ta tërheqin tanimë kuadrin e krijuar. Në programin tonë ekonomik parashohim 140 milion euro për subvencione për kompanitë vendore që do t’i shpërndajmë në katër vitet e ardhshme”, theksoi Zaev. /tesheshi.com/
