Zoran Zaev, kryeministri i Maqedonisë dhe njëkohësisht kryetar i LSDM-së, ka deklaruar se për komunën e Çairit kjo parti do të mbështesë kandidatin e BDI-së, duke u zhbalancuar kështu me BESA-n, e cila ishte realisht forca politike që punoi më shumë se të tjerat që të largojë Nikolla Gruevskin dhe të mbështesë Zaev.
Në një intervistë televizive, Zaev tha se “gjasat janë të larta që me BDI-në të garojmë si koalicion në më shumë komuna, si dhe të marrim përkrahjen e tyre për Bashkinë e Shkupit që në rrethin e parë, e jo të pritet në rrethin e dytë si kalkulim politik”, tha Zaev në televizionin Telma.
Çairi është një prej komunave, pjesë përbërëse e bashkisë së madhe të Shkupit, ku vota e shqiptarëve për kryetarin është e domosdoshme. Sipas regjistrimit zyrtar shqiptarët përbëjnë 26% të popullsisë, por realisht shifra është më e madhe, pasi partitë shqiptarë kanë bojkotuar çdo regjistrim të kryer gjithë këto vite. /tesheshi.com/
