Policia shqiptare shpërndau pamjet e fshehjes e poashtu gjetjes së një sasie prej mijra eurosh, fshehur në një kamion të ardhur nga Italia, e zbarkuar në Durrës.
Rasti i ngjan atij të Toyota Yaris, ku u përfol dhe politika, por që ende nuk është zbardhur e vërteta mbi dërguesit e pritësit.
Në komunikatën e policisë, në fillim të saj theksohet fjala “i shkëlqyer”, referuar operacionit të kapjes së eurove.
“Bashkëpunimi i shkëlqyer i strukturave doganore dhe policore çoi në evidentimin dhe sekuestrimin e një sasie të madhe valute në euro, gjithsej 498.850.
Vihet në pranga drejtuesi i kamionit që transportonte shumën e eurove.
Si rezultat i shtimit të kontrolleve, në hyrje të RSH-së, në vijën e dytë, bazuar edhe në analizën e riskut të bërë nga strukturat doganore, në bashkëpunim me Policinë Kufitare, u ndalua mjeti kamion tip Renault, me drejtues A. Th., 56 vjeç, banues në Tiranë.
Në urën lidhëse të kamionit dhe rimorkios, pas skanimit dhe kontrollit u gjetën të fshehura disa pako të mbështjella, brenda të cilave kishte vlera monetare në euro, të padeklaruara.
Menjëherë është njoftuar grupi hetimor dhe specialistët për Hetimin e Krimit Ekonomik e Financiar në DVP Durrës.
Drejtuesi i kamionit është shoqëruar në DVP Durrës, për veprime të mëtejshme, ndërsa pakot e mbushura me euro u sekuestruan dhe në përfundim të numërimit nga grupi hetimor dhe i filmuar me kamera i gjithë procesi i numërimit rezultoi se në to kishte 498.850 euro.
Në përfundim të veprimeve të para hetimore u bë arrestimi në flagrancë i shtetasit A. Th., 56 vjeç, banues në Tiranë…”, thuhet në deklaratë.
Por shoferi nuk ka shfaqur asnjë “shkëlqim”
sa i përket rrëfimit të tij para hetuesve. Ai ka vendosur, së paku deri më tani, që ta qepë gojën, duke zgjedhur të thotë, siç zakonisht në të tilla raste, se “nuk kishte asnjë dijeni për sasinë e eurove”, pra në automjetin e tij. /tesheshi.com/
