Rusia dhe Irani po ecin përpara me një plan për të ndërtuar një fabrikë të re në Rusi për të prodhuar të paktën 6,000 dronë iranianë për luftën në Ukrainë, shenja më e fundit e thellimit të bashkëpunimit midis dy vendeve, thanë zyrtarë amerikanë në anonimitet.
Si pjesë e forcimit të aleancës ushtarake, shtuan zyrtarët, një delegacion i lartë iranian shkoi në Rusi në fillim të janarit për të vizituar vendin e planifikuar të fabrikës dhe për të përpunuar detajet e projektit, raporton Wall Street Journal (WSJ).
Të dy vendet synojnë të ndërtojnë drone më të shpejtë që do të krijojnë sfida të reja për mbrojtjen ajrore të Ukrainës, thanë zyrtarët.
Më herët, zyrtarët amerikanë thanë se Teherani kishte dërguar disa qindra dronë në Moskë, të cilët dyshohet se ishin përdorur për të sulmuar objektivat civilë në Ukrainë.
Administrata e presidentit amerikan Joe Biden tha se Rusia dhe Irani po zhvillojnë një “partneritet të plotë të mbrojtjes”.
Shtëpia e Bardhë tha se Moska po trajnon pilotët iranianë për të fluturuar me avionë luftarakë rusë, me synimin për t’i dërguar ata avionë në Teheran në fund të vitit.
Në dhjetor, Uashingtoni paralajmëroi se Moska dhe Teherani po shqyrtonin mundësinë e prodhimit të përbashkët të dronëve në Rusi.
Tani, thonë ata, bisedimet janë kthyer në plane konkrete, në kuadër të të cilave është organizuar një vizitë në qytetin Yelabuga, rreth 600 kilometra në lindje të Moskës, ku mund të vendoset fabrika.
Zyrtarët rusë dhe iranianë nuk iu përgjigjën kërkesave për koment, raporton WSJ. /tesheshi.com/
