Në Kosovë pritet të themelohet Asociacioni i komunave serbe e për këtë arsye disa aktivistë të Lëvizjes Vetëvendosje, kanë zhvilluar një aksion simbolik për të treguar se si duket Kosova me “Zajadnicë” dhe si pa të. Në këtë aksion aktivistët e kësaj lëvizje kanë zbuluar një hartë që e ilustron këtë, pra nëse formohet “Zajadnica” rreth 30 përqind të territorit të vendit do të jetë jashtë kontrollit të Republikës së Kosovës.
Sipas VV-së krijimi formal i “Zajednicës” do t’ia pamundësojë institucioneve shtetërore të Kosovës që praktikisht të ushtrojnë sovranitetin në pothuajse 30% të territorit të shtetit. “Kjo pjesë formalisht do të jetë pjesë e Kosovës, por do të funksionojë si entitet i pavarur. Ky entitet autonom do të ketë të gjitha karakteristikat e një minishteti brenda shtetit tonë”, ka thënë aktivisti Nol Nushi.
Ai shtoi se Asociacioni do të ketë edhe polici dhe gjyqësi të vetën të përcaktuar etnikisht. “Strukturat ilegale kriminale të Serbisë do të integrohen brenda institucioneve të Kosovës por që sigurisht jo në shërbim të tyre. Dhe që kjo të funksionojë në mënyrën më të mirë, i është siguruar edhe një linjë buxhetore e veçantë e quajtur Fondi Zhvillimor për Veriun”, ka shtuar Nushi.
Raundi i ri i negociatave në Bruksel duket se temë kryesore do të ketë krijimin e “Zajednicës” e cila do të jetë formalizim i asaj që parashihet me marrëveshjen e 19 prillit 2013 me Serbinë. “Pra, atë çka e filloi Thaçi më 2013 me marrëveshjen 13 pikëshe, po do që ta formalizojë Isa Mustafa me krijimin e Zajednicës”, ka theksuar Nushi.
Po ashtu ai ka theksuar se të gjitha këto do t’i betonojnë përfundimisht kufijtë etnikë brenda Kosovës të nisur qysh nga procesi i decentralizimit më 2007 duke e bërë të pamundur funksionimin e Kosovës si shtet normal.
“Para kësaj të keqe të madhe që po na vjen, nuk guxojmë të rrimë duarkryq. Lëvizja Vetëvendosje! të gjithë potencialin e vet organizativ do ta vërë në funksion të kundërshtimit të këtij plani të dëmshëm. Ditëve në vazhdim do të organizojmë tribuna e tryeza, takime e tubime, protesta e aksione në fshatra e qytete anekënd Kosovës. Dëmi nga ky proces është i pakthyeshëm, andaj s’duhet lejuar të kalojë. Ky moment duhet të jetë thirrje për angazhim për secilin që e ka ndarë mendjen të jetojë në Kosovë. Në këtë situate të jashtëzakonshme, angazhimi bëhet domosdoshmëri”, ka bërë thirrje Nushi./tesheshi.com/
