Aktivistët e lëvizjes Vetëvendosje protestuan ndërsa kryeministri Isa Mustafa merrte pjesë në ceremoninë solemne të 16-vjetorit të policisë së Kosovës.
Aktivistët me anë të parullave u bënë thirrje pjesëtarëve të policisë të mos i qëndrojnë besnik Isa Mustafës pasi ai me veprimet e tij po e rrezikon vetë shtetin.
Ata janë penguar nga policia e cila nuk i lejoi të ngrenë parullën ku shkruhej: “Mos i qëndroni besnik Isës, ai e ka besnikun e tij që i jep tendera”, ku i referohen djalit të kryeministrit.
“Në këtë ceremoni mund të merrte pjesë vetëm ministri i Punëve të Brendshme, por Isa Mustafa po merr pjesë personalisht sepse po do që ta ndërsejë Policinë kundër aktivistëve të lëvizjes Vetëvendosje”, tha për mediat aktivisti Valdrin Ahmeti.
Gjatë aktivitetit, policia ka marrë masa të forta sigurie për vizitën e kryeministrit për të cilin së fundmi, është rritur niveli i mbrojtjes. Edhe studentët në bibliotekën afër sallës së Kuqe ku zhvillohej tubimi, janë detyruar të largohen.
Pas përfundimit të ceremonisë Isa Mustafa nuk u largua nga hyrja kryesore. Ai u largua me një makinë nga hyrja e pasme. /tesheshi.com/
