Me qindra refugjatë të bllokuar në stacionin e trenit në Budapest për dy ditë më radhë, u nisën në këmbë për të arritur kufirin dhe për të kaluar në Austri. Autoritetet hungareze po përpiqen të pengojnë me mijëra njerëz që janë të dëshpëruar të arrijnë në Europën Perëndimore.
Turmat e refugjatëve mbajnë fotografi të kancelares Merkel ndërsa nisen radhë-radhë drejt kufirit. Skenat kaotike në stacionin e trenit në Hungari, e cila përbën pikën kryesore të tranzitit të refugjatëve drejt Gjermanisë, kapën faqet e para të mediave. Qëndrimi i qeverisë hungareze nuk ka ndryshuar edhe pas apelit për më shumë mbështetje ndaj refugjatëve.
Pas bllokimit që iu bë trenave për të mos lejuar lëvizjen e emigrantëve, këta të fundit janë të vendosur të ecin 240 kilometra në këmbë për të arritur kufirin.
Ndërkaq, me qindra njerëz që mbahen në një kamp refugjatësh në Roszke pranë kufirit me Serbinë kanë dalë jashtë rrethimit, ndërsa mijëra të tjera kërcënojnë të largohen pa pyetur për policinë. /tesheshi.com/
