Nga redaksia
Dallibor Milivojeviq, i njohur me nofkën “Kurivoje”, është personi i arrestuar nga Policia e Kosovës të enjten në orët e mbrëmjes në afërsi të Zubin Potokut, si i dyshuar kryesor për hedhjen e një preparati kimik në një kanalizim, e prej aty edhe në lumin Ibër, duke rrezikuar dhe helmimin e ujit me të cilin furnizohet Mitrovica.
Por një burimi i portalit tesheshi.com nga ana e Veriut, thotë se ka dyshime nëse është vërtetë Milivojeviq që e ka hedhur substancën kimike, ndërsa gjasat janë që këtë veprim ta ketë kryer bosi i naftës për Veriun, Millojko Radisavleviq, i njohur me nofkën “Babudovac”.
Burimi ka shtuar se Dallibor Milivojeviq e ka pranuar fajësinë para Policisë së Kosovës, por vetëm pasi kjo i është diktuar nga eprori i tij, Millojko Radisavleviq, i cili prej vitesh është në kërkim nga Policia dhe Drejtësia në Kosovë për vepra të ndryshme kriminale dhe kontrabandë.
“Pranoje fajësinë se unë të nxjerr nga burgu se unë kam shumë njerëz në Polici në Veri, se po të më kapin mua, unë kam edhe fletë-arrest të lëshuar nga EULEX-i dhe më nuk më lëshojnë”, citohet të jetë shprehur Radisavleviq duke folur me “ushtarin” e tij të bindur, Milivojeviqin, kjo sipas burimit që informon konfidencialisht redaksinë e portalit tesheshi.com.
Po kush është Dallibor Milivjeviq?
I njohur me nofkën ‘Kurivoje’, ai është rreth 35 vjeç, i martuar, dhe punon në kompaninë energjetike ilegale të Serbisë që vepron në veri të Kosovës, “Elektroprivreda Serbije”.
Milivojeviq, e ka shtëpinë në një vend atraktiv në fshatin Jasenovik, dhe për këtë arsye, tokën atij ia kanë marrë me qira tajkunët e naftës, vëllezërit Millan e Millojko Radisavleviq, të njohur si “Babudovac”-ët.
Në tokën e Milivojeviqit, “Babudovac”-ët, kanë ngritur një pikë karburanti duke tregtuar naftë, nga ajo e kontrabandës që kryhet ditën për diell në Veri, prej së cilës një dorë e mirë serbësh “të fortë” kanë arritur të fitojnë miliona. Dhe shef i kësaj pike karburanti është pikërisht Dallibor Milivjeviq, “ushtari” i tyre i bindur që akuzohet se ka hedhur lëndë helmuese në ujrat e Ibrit.
Burimi i portalit tesheshi.com thotë se Dallibor Milivjeviq, i punësuar tek “Babudovac”-ët, vozit gjithashtu autobotet e tyre duke e shpërndarë naftën nëpër pika të tjera të karburanteve në veri të Mitrovicës dhe Kosovës.
Ndër të tjera, burimi thotë se strukturat paralele serbe në veri të Mitrovicës dhe Kosovës janë duke bërë presion në mediat serbe që të mos publikojnë arrestimin e Dallibor Milivojeviqit, ndërkohë që ka raste kur portale lajmesh në Veri, nga presioni i “Babudovac”-ve kanë hequr nga faqja e tyre lajmin e të enjtes ku kanë raportuar për arrestimin e tij.
Siç është bërë me dije, substanca kimike e hedhur në Ibër është pentan-i, i cili që përzihet me vaj motori dhe kthehet në naftë të lirë.
Portali tesheshi.com, ka provuar që të kontaktojë me Policinë e Kosovës në veri të Mitrovicës, por telefonat e tyre kanë qenë të mbyllur gjatë gjithë kohës. /tesheshi.com/
