Lëvizja ‘Vetëvendosje’, përmes një komunikate për media, ka reaguar në lidhje me arrestimet e fundit të deputetëve të opozitës ditën e sotme.
Sipas tyre, arrestimet e deputeteve Teuta Haxhiu, Time Kadriaj, si dhe të deputetit Pal Lekaj, vetëm sa e shtojnë ashpërsinë e autoritarizmit në Kosovë.
“Qeveria Veseli – Mustafa – Thaçi, tashmë haptazi ka përqafuar metodat e tiranisë”, thuhet në reagim.
VV kërkon që të hetohen të gjithë deputetët dhe pushtetarët e korruptuar.
“Le të hetohen të gjithë deputetët dhe pushtetarët e korruptuar, le të arrestohen deputetët që dyshohen për krime e për pjesëmarrje në organizata të paligjshme. Por në asnjë mënyrë nuk mundet të pranohet prej askujt arrestimi i deputetëve për bindjet e tyre politike, në mbrojtje të Kosovës”.
“Fajtor kryesor për këto arrestime është personi i cili ka nënshkruar marrëveshjet e dëmshme pa e pyetur opozitën dhe pa e marrë parasysh shprehjen popullore përmes peticionit, pra Isa Mustafa. Por bashkëpunëtorët e tij janë po aq fajtorë, pra edhe dyshja Veseli – Thaçi”.
“Bëjmë thirrje të lirohen deputetët, dhe të tërhiqen marrëveshjet, në mënyrë që institucionet të kthehen në normalitet dhe në mënyrë që opozita të mos përjashtohet e të mos shtypet, por të trajtohet ashtu siç e kërkojnë rregullat demokratike. Marrëveshjet nuk do të kalojnë, opozita nuk do të ndalet!”, thuhet në reagimin e VV-së.
/tesheshi.com/
