Në një fjalim të paralajmëruar, i cili pritej me shumë kërshëri, presidenti serb Aleksandar Vuçiç, para publikut nga Pallati i Serbisë, prezantoi kërkesat dhe lëvizjet në lidhje me situatën në Kosovë, të ndarë në pesë fusha, dhe theksoi se do të bëhet një fushatë diplomatike globale e nisur për këtë qëllim dhe se deri në fund të nëntorit do të bisedojë me 60 liderë botërorë të cilëve do t’u prezantojë shtatë pikat e nevojshme për përparim në dialog.
“Ne kërkojmë një kthim në Status Quo duke hequr pasojat kryesore të veprimeve të njëanshme dhe të pakoordinuara të regjimit të Kurtit, që është një parakusht i domosdoshëm për përparim kuptimplotë në procesin e dialogut”, tha Vuçiç.
Ai shtoi se ngre shtatë pika të nevojshme për vazhdimin e dialogut.
“Së pari shpallja dhe mbajtja e zgjedhjeve lokale të lira dhe demokratike në veri të Kosovës dhe Metohisë, me pjesëmarrjen e misionit të OSBE-së dhe kontrollin e BE-së. Nën dy, zbatimi i nenit 9 të Marrëveshjes së Parë të Brukselit përmes kthimit kolektiv të serbëve në Drejtorinë Rajonale të PK-së Veri. Pika tre, kthimi i gjyqtarëve dhe prokurorëve serbë në pozitat gjyqësore. Më pas, nën katër, tërheqja e të ashtuquajturave forca speciale të Policisë së Kosovës nga bazat dhe postblloqet e ndërtuara ilegalisht në veri të Kosovës dhe Metohisë, si dhe tërheqja e tyre nga të gjitha institucionet, të cilat nga viti 1999 deri në mbylljen e tyre të paligjshme në vitin 2024 ofrojnë shërbime jetike publike dhe administrative për qytetarët”, tha Vuçiç.
Ai tha se pika e pestë do të jetë formimi urgjent, i menjëhershëm dhe përfundimtar i bashkësisë së komunave serbe, pa shaka dhe lojëra të mëtejshme politike.
“Loja ZSO përdoret për të blerë kohë”
“Sepse neve e kemi të qartë se për 12 vjet ka qenë vetëm një lojë që është përdorur për të fituar kohë, me synimin që ZSO të mos formohet kurrë dhe të hiqen të gjitha të drejtat e serbëve. Kjo konkretisht nënkupton miratimin e draftit përfundimtar të statutit të ZSO-së në mënyrën e paraparë me Rregulloren e Punës së Ekipit Menaxhues, nga përfaqësuesit e komunitetit serb në veri të Kosovës dhe Metohi të zgjedhur në mënyrë demokratike”, ka shtuar ai.
Pika e gjashtë është “zbatimi i menjëhershëm i garancive të Bashkimit Evropian dhe SHBA nga 28 dhjetori 2022 dhe lirimi i menjëhershëm i të gjithë të burgosurve politikë që u arrestuan nga Policia e Kosovës për aktivizmin e tyre demokratik, qytetar apo politik – dhe veçanërisht të arrestuarve për pjesëmarrje në protesta paqësore apo barrikada”.
Siç tha Vuçiç, pika e shtatë është ofrimi i menjëhershëm i transaksioneve të pagesave të pandërprera dhe shërbimeve postare.
“Këto kërkesa do të përcillen në aktivitetet e ardhshme ndërkombëtare, të cilat do të përfshijnë bisedime dhe ngjarje të veçanta brenda sistemeve të OKB-së dhe OSBE-së, si dhe ndërgjegjësimin për shkeljen e të drejtave të njeriut të serbëve brenda Komitetit të të Drejtave të Njeriut të OKB-së”, tha president serb.
“Unë do të flas me të gjithë për këtë dhe do t’ua prezantoj atyre,” shtoi ai.
Vuçiç ka deklaruar se është e nevojshme të formohet “Drejtoria Veri”, ku policët në veri të Kosovës do të jenë serbë.
Vuçiç po ashtu tha se beson se nuk ka zgjidhje të kënaqshme për serbët për çështjen e Kosovës, transmeton agjencia Beta.
“Nuk ka zgjidhje të kënaqshme”
“Nuk ka zgjidhje për problemin Kosovë-Metohi që do të ishte e kënaqshme për serbët. Nuk ka zgjidhje të tillë. Nuk ka asnjë mrekullibërës që mund t’u sjellë serbëve një zgjidhje të mirë për Kosovën dhe Metohinë. E pranoj”, u tha Vuçiç gazetarëve në Beograd.
Ai deklaroi se i di të gjitha problemet që kanë serbët në Kosovë, nga ato juridike, politike, e deri tek ato ekonomike, duke përsëritur se “e di që nuk ka zgjidhje të mirë dhe nuk do të gënjejë dhe mashtrojë askënd”.
Masat që ai prezantoi sot, sipas tij, nuk janë të lehta dhe të thjeshta, por kërkojnë përpjekje dhe punë të jashtëzakonshme.
“Çfarëdo masash që të propozojnë dhe çfarëdo që të bëjnë, askush nuk do të jetë i kënaqur, përveç një rrethi të vogël njerëzish racionalë që duan të jenë të drejtë me veten dhe me gjithë të tjerët, duke kuptuar se si është situata në Kosovë dhe Metohi”, tha Vuçiç. /tesheshi.com/
