Vuçiç me Çavushoglu: Turqia, partneri ynë i fortë!

Ne e shohim Turqinë si një partner të fortë dhe jemi shumë të përkushtuar për zhvillimin dhe thellimin e marrëdhënieve të përgjithshme, tha presidenti serb Aleksandar Vuçiç në një bisedë me ministrin e Jashtëm turk Mevlut Çavushoglu në Beograd.

Gjatë takimit u nënshkrua dhe marrëveshja e cila do t’u mundësojë qytetarëve të Serbisë dhe Turqisë që të dy vendet t’i vizitojnë vetëm me letërnjoftime, njoftoi shërbimi për shtyp i presidentit serb.

“Ne kemi interesa të përbashkëta ekonomike dhe është e rëndësishme për ne që Turqia të ndihmojë zhvillimin e pjesëve më pak të zhvilluara të Serbisë me investime të mëdha,” tha Vuçiç, duke shtuar se ai vlerësoi kontributin personal të presidentit turk Rexhep Tajip Erdogan në bashkëpunimin dypalësh dhe sjelljen e investitorëve turqi në Serbi.

Me takimin me presidentin e Serbisë, ministri turk filloi vizitën e tij zyrtare në vendet e Ballkanit Perëndimor.

Pas vizitës në Serbi, Çavushoglu do të vizitojë Maqedoninë e Veriut, pastaj Kroacinë, Bosnjen dhe Kosovën.

Vizita e Çavushoglu në Ballkanin Perëndimor vjen në një kohë tensionesh të larta, veçanërisht në Bosnje, të nxitura më tej nga pushtimi rus i Ukrainës në shkurt të këtij viti.

Vuçiç tha se ruajtja e paqes në rajon është shumë e rëndësishme për Serbinë, duke shtuar se vetëm bashkëpunimi intensiv i të gjitha vendeve të Ballkanit Perëndimor mund të mundësojë prosperitet dhe zhvillim jo vetëm të Serbisë, por edhe të të gjitha vendeve të rajonit.

Ai tha se lidhjet infrastrukturore janë çelësi për zhvillim edhe më të fuqishëm ekonomik dhe investime më të mëdha, por edhe për bashkëpunim në të gjithë rajonin dhe se autostrada Beograd-Sarajevë është projekti më i rëndësishëm që do të realizohet me ndihmën financiare të Turqisë.

“Bashkëpunimi për projektin e ndërtimit dhe shfrytëzimit të Rrjedhës Turke, i cili mundëson furnizimin e rajonit me gaz natyror dhe realizimi i të cilit siguron diversifikimin e rrugëve dhe burimeve të furnizimit dhe përmirëson sigurinë e furnizimit të vendeve tona dhe më gjerë të rajonit, është jashtëzakonisht e rëndësishme për Serbinë”, tha Vuçiç. /tesheshi.com/