Presidenti i Serbisë, Aleksandar Vuçiç ka deklaruar se ka prova të mjaftueshme të marra nga agjencitë e intelegjencies për “shumë veprime fyese të Maqedonisë kundër autoriteteve dhe institucioneve të Serbisë”.
Komentet e kreut të shtetit serb vijnë pas tërheqjes së personelit të Ambasadës së Serbisë nga Maqedonia.
Vuçiç para gazetarëve ka thënë se Serbia po pret vendimin e Shkupit dhe Podgoricës nëse do ta përkrahin anëtarësimin e Kosovës në UNESCO apo jo.
“Ne do të ndërtojmë raporte të mira me Shkupin, por këto raporte duhet të bazohen në respektin e ndërsjellë. Ne do të shohim nëse shqiptarët do të lëvizin për anëtarësimin në UNESCO, dhe do të presim se çfarë do të thonë Shkupi dhe Podgorica. Ne duhet të përgatitemi dhe të dimë se si ato do të përgjigjen. Ka shumë spekulime, por unë mendoj se në 10 ditët e ardhshme çdo gjë do të jetë me qartë”, tha Vuçiç.
Deklarata e tij për agjencinë e lajmeve “Tanjug” është dhënë menjëherë pas takimit me ambasadorin rus në Serbi, Aleksandar Vasiljevic Chepurin.
Pak më parë Ministria e Punëve të Jashtme e Maqedonisë ka pranuar një notë nga ambasada e Serbisë në Shkup, në të cilën është njoftuar se personeli i Ambasadës është ftuar për konsultime në Beograd.
“MPJ e Maqedonisë nuk është e njoftuar me arsyet e këtij vendimi dhe në këtë drejtim po vendos komunikim me atë të Serbisë në drejtim të vërtetimit të arsyeve për këtë veprim. Sipas dispozitave përkatës të Konventës së Venedikut për Marrëdhënie Diplomatike, institucionet përkatëse të Maqedonisë po ndërmarrin masa për mbrojtje të sigurisë dhe integritetit të ambasadës së Serbisë në Shkup”, thuhet në njoftimin e MPJ-së së Maqedonisë. /tesheshi.com/
