Nga Blendi Gashi
Presidenti i vendit, Hashim Thaçi pas 17 vitesh heshtje i dërgoi dje katër letra kryeprokurorit të shtetit, Aleksandër Lumezi, përmes të cilave kërkoi që të bëhet hetimi i vrasjeve gjatë dhe pas luftës në Kosovë.
Ky veprim i papritur i ndërmarrë nga ish-kryeministri sot president, ka çuar shumë pluhur në opinionin publik kosovar, ku vijnë zëra të ndryshëm rreth asaj se pse ish-kreu politik i UÇK-së e i PDK-së, pas kaq vitesh ndërmori një hap të tillë, kur të njëjtën gjë ka mundur ta bëjë gjatë kohës sa ishte kryetar i qeverisë, gjatë dy mandateve.
Organizatat jo-qeveritare që merren me monitorimin e institucioneve të drejtësisë, thonë se Thaçi me veprimet e tij po ndërhynë në punën e Prokurorisë së Shtetit dhe se vrasjet e kryera gjatë dhe pas luftës nuk mund të zbardhem përmes letrave.
Edhe përfaqësues të opozitës thonë se presidenti doli prej kompetencave të tij, dhe se me konferencën e djeshme u mundua t’iu hedh hi syve qytetarëve për dështimet e tij.
“Kryeprokurori i Shtetit s’duhet të këshillohet për të filluar ndjekje penale nga pushtetet tjera”
Ehat Miftaraj, nga Insituti i Kosovës për Drejtësi (IKD), thotë se thirrja e bërë nga presidenti Thaçi për hetimin e vrasjeve gjatë dhe pas luftës mund të interpretohet edhe si ndërhyrje në punën e institucionit të Prokurorit të Shtetit.
Miftaraj, thotë se praktika ka dëshmuar se pothuajse asnjë president i Kosovës që nga shpallja e pavarsisë nuk ka shfrytëzuar autoritetin e tij për të krijuar kushte adekuate përmes ndarjës së buxhetit dhe mjeteve financiare të nevojshme për sistemin gjyqësor dhe prokurorial, në mënyrë që të njëjtat të mund të funksionin dhe ushtronin kompetencat dhe përgjegjësitë e tyre në pajtim me Kushtetutë dhe ligj.
“Presidenti i Republikës nuk ka ndonjë kompetence lidhur me propozimin e zhvillimit të politikave dhe strategjive lidhur me luftimin e kriminalitetit në Kosovë, e aq më pak për të kërkuar hetime në raste individuale. Vullneti i pushteteve tjera në raport me sistemin gjyqësor duhet të dëshmohet përmes miratimit të buxhetit të nevojshëm për sistemin gjyqësor dhe prokurorial dhe ofrimit të kushteve adekuate për pune. Vullneti për të vënë drejtësi në Kosovë nuk mund të realizohet përmes letrave drejtuar institucioneve të pavarura që janë të thirrura me ligj për të kryer obligimet e tyre”, thotë Miftaraj, për tesheshi.com.
Miftaraj, thotë se Kushtetuta dhe ligji në Kosovë përcakton se Prokurori i Shtetit ka obligim kushtetues dhe ligjor për të hetuar dhe ndjekur penalisht të gjitha rastet kur ka dyshim se është kryer ndonje vepër penale. Ai thotë se Prokurori i Shtetit këtë obligim duhet ta kryej për shkak se është i thirrur dhe autorizuar për të vepruar në këto raste.
“Kryeprokurori i Shtetit në asnjë rrethanë nuk duhet të këshillohet për të filluar ndjekje penale për raste individuale nga ana e pushteteve tjera në Kosovë. Pasi kjo mund të interpretohet edhe si ndërhyrje në punën e një institucioni të pavarur, si është Prokurori i Shtetit. Ligji për Këshillin Prokurorial të Kosovës, përcakton se Këshilli në bashkëpunim me Zyrën e Kryeprokurorit të Shtetit zhvillon politikat dhe strategjitë prokuroriale për të luftimin efektiv të kriminalitetit. Këshilli po ashtu i propozon Qeverisë dhe Kuvendit masat lidhur me sistemin prokurorial dhe për luftimin e kriminalitetit”, thotë Miftaraj, për tesheshi.com.
“Afër fundi i ‘epokës’, së Thaçit”
Për kërkesën e Thaçit dërguar Prokurorisë, në seancën plenare foli edhe deputetja partisë opozitre NISMA për Kosovën, Valdete Bajrami, e cila tha se në mesin e letrave që presidenti Thaçi dërgoi të hënën në Prokurorinë e Shtetit, do duhej ta dërgonte edhe një tjetër, atë për vete.
Deputetja Bajrami tha se është e kotë që me një konferencë t’i hidhet hi qytetarëve për dështimet e tij, dhe se me gjithë këto të bëma që nga paslufta, është afër fundi “epokës” së Hashim Thaçit.
“E tërë bota e ka kuptuar se çfarë njeriu jeni ju, nuk do të mund t’i ikni përgjegjësisë, ju e dini që fundin e keni afër”, tha Bajrami në seancën plenare.
“Ndërhyrje e drejtëpërdrejtë në drejtësi”
Muhamet Kelmendi, anëtarë i Kryesisë së AAK-së thotë se forma e komunikimit të Thaçit me Prokurorinë me këto katër letra nuk ka ndodhur askund më parë dhe është përzierje në Prokurori dhe Gjykata.
“Kjo është ndërhyrje e drejtpërdrejtë dhe joligjore, njashtu edhe jashtë kompetencave. Thaçi është dashur që nga pozicione të tjera dhe forma të tjera të adresojë këto çështje. Është dashur të merremi shumë më herët me këtë çështje. PDK-ja i ka 10 vjet që është në pushtet, kush i ndalojë që të merren me të gjitha raste që kanë ndodhur në mënyrë të vazhdueshme deri më sot?”, ka thënë për mediat, Kelmendi.
Ai më tej ka thënëse Thaçi është në pushtet që nga paslufta, dhe është dashur të shkoj nga rruga që përmes Parlamentit të krijohet një ligj i veçantë për raste të tilla, që më pas të krijohet edhe një gjykatë për këto raste.
“Kjo çfarë ka bërë Thaçi është kalim i kompetencave. Kjo nuk mund të llogaritet përkrahje për sistemin e drejtësisë, ka pasur mundësi ta përkrahë në forma të ndryshme nga pozita e kryeministrit”, ka deklaruar Kelmendi.
Ndryshe, kryeprokurora e Shtetit ka njoftuar se ka pranuar katër letrat e presidentit Thaçi duke thënë se kryeprokurori Aleksandër Lumezi do t’i ndërmarr të gjitha veprimet e tija kushtetuese dhe ligjore në bashkëpunim me të gjithë mekanizmat vendorë dhe ndërkombëtarë. /tesheshi.com/
