Në vetëm pak ditë në Shtëpinë e Bardhë, Donald Trump është përballur me kundërshtinë e parë ndaj planeve të tij të bëra të ditura dhe më herët.
Presidenti i ri amerikan ka nënshkruar një urdhër ekzekutiv për një “pengesë fizike të pakalueshme”, gjë që nënkupton ngritjen e murit në kufi në Meksikën, si dhe ka këmbëngulur e këmbëngul që vendi fqinj do të paguajë për këtë.
Por nuk mendon kështu presidenti meksikan, Enrique Pena Nieto. Në një fjalë të shkurtër për popullin e tij, Pena Nieto ka deklaruar sfidueshëm:
“Më vjen keq dhe e dënoj vendimin e Shteteve të Bashkuara për të vazhduar ndërtimin e një muri që për vite na ka ndarë në vend që të na bashkojë. Meksika nuk beson në mure. E kam thënë në mënyrë të përsëritur: Meksika nuk do të paguajë për asnjë mur.”
Me gjithë tonin e lartë, presidenti meksikan nuk përmendi një shtyrje apo anulim të vizitës së tij në Uashington në fund të muajit për të takuar homologun Trump.
Zëdhënësi i Shtëpisë së Bardhë, Sean Spicer, bëri të njohur se urdhri ekzekutiv i nënshkruar të mërkurën do të mundësojë ndërtimin e një pengesë të madhe fizike në kufirin jugor.
“Ndërtimi i kësaj pengese është më shumë se thjesht një premtim fushate. Eshtë hapi i parë i një gjykimi të shëndoshë për të siguruar vërtet kufirin tonë të depërtueshëm,” deklaroi Spicer. /tesheshi.com/
