Në një urim për fundvitin 2018 dhe ardhjen e 2019-ës, kryeministri Rama ka theksuar fillimin e të riut pa lojra fati.
“Këto janë edhe 6 orët e fundit të kumarit në Shqipëri. Nga nesër, asnjë prind nuk do të ketë më frikë nga borxhet e fëmijëve në kumar, asnjë familje nuk do të jetë më e kërcënuar nga konfliktet rraskapitëse dhe divorcet për shkak të kumarit. Qindra miliona euro që deri më sot i ka marrë lumi dhe i ka thithur llumi i botës së errët të bixhozit do të mbeten në arkën e familjeve shqiptare për konsum”, deklaroi më tej Rama.
Ndër të tjera në mesazhin e tij, Rama u ka kërkuar ndjesë shqiptarëve për shumë çështje, e njëherësh ka vënë theksin në të arritura por dhe në ato që pritet të arrihen.
Por megjithatë, shefi i qeverisë është përpjekur të tregohet edhe realist, duke theksuar se jo gjithçka shkon si duhet, e së për këtë i duhet të kërkojë ndjesë.
“E di mirë që ka ende jo pak shqiptarë që mezi e nxjerrin muajin, apo që nuk u bëjnë dot një dhuratë fëmijëve të tyre për Vitin e Ri. Duke i kërkuar ndjesë sinqerisht kujtdo që nuk ka prekur ende asgjë nga këto arritje të 2018-s, i siguroj që të gjithë se kjo është arsyeja kryesore që më motivon në betejat e përditshme për Shqipërinë që duam”, tha Rama. /tesheshi.com/
