Nga Gjergji Koja
Zyrat e Regjistrimit të Pasurive të Paluajtshme kanë në shyqrtim rreth 2200 dosje të zyrtarëve që do të jenë objekt i vettingut në kuadër të reformës zgjedhore. ZRPP po kontrollojnë mbi pasuritë e paluatshme të zyrtarëve, transaksioneve të ndryshme që mund të kenë ndodhur me pronat, regjistrimin e tyre, ndryshimet e pronësisë etj.
Dosjet i përkasin gjyqtarëve dhe prokurorëve, si dhe familjarëve apo personave të afërt të lidhur me to.
Burimet nga ZRPP bëjnë të ditur për tesheshi.com se kryesisht proçesi është i thjeshtë për shkak të dixhitalizimit, por çdo e dhënë po ballafaqohet pasi mund të ketë raste që për një arsye apo tjetër qëllimisht dosjet mund të fshihen, ose elementë të tyre mund të mos raportohen.
Në këto kushte po bëhet një ballafaqim mes regjistrave shkresorë dhe të dhënave digjitale të hedhura në sistem, për të parë përputhshmërinë e tyre.
Sikundër raportohet, konkluzionet e dala nga zyrat e ZRPP do të ballafaqohen me deklaratat zyrtare të pasurive të depozituara në ILDKPI, për të parë nëse e gjithë pasuria e deklaruar përputhet apo jo me atë që ndodhet në realitet.
Një tjetër hap që ka nisur është ai i verifikimit të pronave që mund të jenë blerë jashtë vendit nga persona që janë objekt i vettingut, por që mund të mos jenë pasqyruar në deklaratat e pasurisë. Këtu është kërkuar bashkëpunimi i institucioneve ndërkombëtare apo strukturave homologe të ILDKPI apo Hipotekës, për të kontrolluar në sistem të gjithë situatën.
Por çfarë ndodh nëse një individ gjyqtar apo prokuror, pronën e tij e ka të regjistruar në emrin e dikujt që nuk ka lidhje familjare, por shoqësore?
Burimet shprehen se në rastet e dyshimeve do të ketë kontrolle edhe më të gjera se rrethi familjar dhe personat që mund të rezutojnë me pasuri përtej asaj që mund të kenë vënë referuar të ardhurave që kanë pasur, do të përfshihen nën hetim.
“Raste të tilla mund të jenë të rralla, kjo edhe për faktin se është e vështirë që një pronë, pavarësisht sesi mund t´a kesh përfituar ta regjistrosh në emër të një personi pak të largët, qoftë ky mik apo shok. Praktikisht një pronë të tillë ose e ke të humbur ose mund ta humbasësh përfundimisht”, shprehen burimet.
Gjithsesi pohohet se raste të tilla janë evidentuar për çështje të ndryshme që kanë qenë në hetim dhe e njëjta proçedurë mund të ndiqet edhe në rastet e kontrollit të pasurive të personave që janë subjekt i vettingut.
