Nga Gjergji Koja
Ministri i Brendshëm, Fatmir Xhafaj, ka firmosur urdhërin për nisjen e proçesit të vettingut për Policinë e Shtetit, Gardën e Republikës dhe shërbimin e kontrollit të brendshëm, një strukturë që ka si detyrë ligjore monitorimin dhe hetimin e strukturave policore.
Burime nga Ministria e Brendshme bënë të ditur për tesheshi.com se deri në fund të vitit do të ngrihen strukturat dhe baza ligjore mbi të cilën do të veprojnë të paktën dy komisione, që do të monitorohen nga misionet PAMECA dhe ICITAP, ndërsa në fillimin e vitit të ardhshëm do të nisë veprimtaria konkrete e tyre.
Sikundër mësohet për realizimin e vettingut në polici po shqyrtohen disa variante, por burimet shprehen se ndoshta mund të përdoret një draft miks me praktika të ndjekura në disa shtete, që kanë ngjashmëri me Shqipërinë, referuar qoftë mënyrës së organizimit ashtu edhe pagave për uniformat blu.
Vettingu në polici do të përfshijë jo vetëm aspektin profesional, por edhe pasuritë, lidhjet me krimin, përfitimin e gradave, emëriimet në detyrë dhe deri rekrutimin në rradhët e strukturave.
Burimet theksojnë se për këtë arsye do të kërkohet bashkëpunimi me disa institucione për të verifikuar pasuritë e paluajtshme që zotërohen, por edhe transaksionet financiare që mund të jenë kryer përmes sistemit bankar apo çdo sistemi tjetër që le gjurmë.
“Drafti ligjor do të hartohet në mënyrë të tillë që të ketë kontrolle të imtësishme, duke nisur nga automjetet që përdoren dhe çdo aset tjetër. Madje edhe shpenzimet e përditshme, kur ka të dhëna se ato janë më të larta se sa të ardhurat e ligjshme”, shprehen burimet.
Tesheshi.com ka mësuar se proçesi do të nisë nga drejtuesit e lartë të policisë për tu shtrirë në të gjitha nivelet, përfshi këtu edhe rolin bazë të policisë. Ndërkohë që struktura e parë që do të kalojë testin është shërbimi i kontrollit të brendshëm dhe policia kriminale.
Burimet theksojnë se për realizimin e një kontrolli të plotë do të shfrytëzohen jo vetëm të dhënat që janë mbledhur ndër vite nga vetë strukturat e policisë, por edhe ato të agjensive ligjzbatuese, vendase dhe të huaja.
Më konkretisht raportet e përvitshme të shërbimeve sekrete mbi trafikun e drogës, të njerëzve apo çdo veprimtari tjetër të paligjshme, do të jenë pikënisje për të hetuar dhe kontrolluar lidhjet mes grupeve kriminale dhe uniformave blu.
Në këtë kuadër, duke shfrytëzuar të dhënat e raporteve, do të shihet veprimtaria e policisë, përgjegjësia dhe do të analizohen shkaqet sepse nuk është ndërhyrë apo nuk janë parandaluar veprimtari të paligjshme.
“Nëse një raport evidenton se në një zonë të caktuar ka pasur veprimtari të paligjshme, atëherë do të analizohet pse strukturat policore nuk kanë ndërhyrë. Gjithçka do të kontrollohet nga lart-poshtë, pra duke nisur nga drejtuesit që mund të jenë drejtorët vendorë, shefat e komisariateve, ato të rendit, inspektorët e zonave për të arritur në policët e rolit bazë”, shprehen burimet.
Gjithashtu është menduar që të vendosen linja të denoncimit publik, ky qytetarët të japin informacionet e tyre mbi lidhjet që mund të dinë mes punonjësve të policisë dhe elementëve kriminalë, të cilat do të analizohen dhe nëse rezultojnë të sakta mund të përbëjnë një tjetër bazë për zbatimin e vettingut. /tesheshi.com/
