Ka marrë një përmasë akoma më serioze çështja e pretendimeve të PD-së për përkthim të gabuar të vettingut. Orë pasi këtë version e mbrojti “specialisti demokrat” i situatave të tilla delikate, Oerd Bylykbashi, detyrohet që të reagojë dhe Brukseli. Zëdhënësja e BE-së, Maja Koçijançiç i ka quajtur të rreme pretendimet e demokratëve.
“BE dënon përhapjen publike të akuzave të rreme që pretendonin se EURALIUS dhe Delegacioni i BE-së janë përfshirë në gabime që supozohen të qëllimshme në përkthimin anglisht të legjislacionit shqiptar që i është dërguar për shqyrtim Komisionit të Venecias”, thuhet në deklaratë të orëve të fundit. Më pas, edhe nga BE, ashtu siç dhe nga ambasadori Lu që një ditë më parë theksoi “frikën nga vettingu”, është vënë dukje vullneti për ta penguar reformën.
“Veprimet apo deklaratat, të cilat në mënyrë artificiale synojnë të krijojnë konfuzion, duket se kanë të vetmin qëllim që të mundohen të vonojnë zbatimin e reformës së drejtësisë, përfshirë rivlerësimin e gjyqtarëve dhe prokurorëve”, thuhet në deklaratën e Brukselit.
Oerd Bylykbashi i kushtoi një konferencëtë veçantë “gabimit në përkthim të vettingut” këtë të martë, duke e zbërthyer në mënyrë të detajuar pretendimin e PD-së; kjo, si kundërpërgjigje ndaj ambasadorit Lu, që nuk nguroi të quante “frikacakë” ata që sipas tij po pengojnë vettingun. /tesheshi.com/
