Dega e Lëvizjes Vetëvendosje në Gjilan përmes një komunikate për media deklaroi se 10 vite më parë, qytetarët e Anamoravës u përballen me decentralizimin etnik që po planifikohej të bëhej në këtë zonë.
“Decentralizimi etnik është veç rindarje e brendshme e Kosovës, ku më shumë theksohen kufijtë e brendshëm mes komunave me shumicë serbe dhe komunave tjera, sesa kufijtë e jashtëm të Kosovës në raport me Serbinë”, thotë Vetëvendosje, e cila ka paralajmëruar reagime të ashpra kundër themelimit të Asosacionit të komunave serbe në vend.
Aktivistët e Gjakovës japin shembullin e fshatrave të Anamoravës që ishin me shumicë serbe e që përmes decentralizimit i lidhën mes tyre duke krijuar komuna të reja me shumicë serbe, për ta rrethuar mes tyre Anamoravën, dhe për t’ia ndërprerë asaj vazhdimësinë territoriale me Luginën e Preshevës.
Vetëvendosje rikujton gjithashtu, se Gjilani nga 515 km2 sa i kishte, i humbi 123 km2. Komuna e Artanës u trefishua, sips VV-së vetëm e vetëm që shqiptarët të mbeten pakicë, që të mund të quhet komunë me shumicë serbe.
Një proces i ngjashëm sipas Vetëvendosjes, ndodhi me copëtimin e komunave Gjilan, Dardana e Viti, për t’u krijuar Parteshi, Ranillugu, Kllokoti dhe Artana e zgjeruar. Në vitin 2009, qytetarët e rajonit të Anamoravës grumbulluan mbi 30.000 nënshkrime në peticionin kundër decentralizimit, peticion ky që nuk u mor parasysh as nga institucionet qendrore e as nga ato lokale.
Vetëvendosje thotë se fillimet e këtij decentralizimi u justifikuan nga qeveritarët me argumentin se ky është çmimi që duhet paguar për pavarësinë, por tashmë, thotë VV, “se decentralizimi ishte veç kapar, si garanci për “Zajednicën”.
“Nga momenti i themelimit të saj, asnjë institucion i Kosovës nuk do të mund ta shuajë më. Territori fillestar i saj do të jetë veriu i Kosovës. Në vend që Qeveria e Kosovës të punonte në integrimin e pjesës veriore të Kosovës, ashtu që të mund të quheshim shtet sovran, përmes negociatave të vazhdueshme me Serbinë u bë shumëzimi i veriut nëpër pjesët tjera të Kosovës. Decentralizimi etnik e bëri Anamoravën terren për një veri të dytë, ku do të synojë të zgjerohet “Zajednica”, për të marrë kështu më shumë territor e pasuri”, theksohet në deklaratën e lëvizjes.
“Që Kosova të mos copëtohet, “Zajednica” nuk duhet të ekzistojë. Të gjithë bashkë, kundër “Zajednicës”, për Kosovën”, përfundon njoftimi i degës së Vetëvendosjes në Gjilan. /tesheshi.com/
