Prishtinë – Në komisionet e ndryshme parlamentare – aty ku bëhet puna më e madhe në hartimin e ligjeve, duhet të rritet niveli i pjesëmarrjes së shoqërisë civile, grupeve të interesit, ekspertëve të pavarur si dhe të ketë prani më të madhe të medieve.
Kështu ka deklaruar të mërkurën kryetari i Kuvendit të Kosovës, Kadri Veseli, i cili gjatë pjesëmarrjes në tryezën e organizuar nga Instituti Demokratik Kombëtar lidhur me pjesëmarrjen e qytetarëve përmes transparencës parlamentare, ka theksuar se është i përkushtuar që në komisionet parlamentare të ketë sa më shumë “prani të qytetarëve”.
Sipas tij, nuk mjafton njëherë në katër vjet të pyeten qytetarët se si duan të qeverisen, por është tejet e nevojshme që gjatë gjithë kohës ata të jenë pjesë aktive në procesin e krijimit të ligjeve dhe hartimit të politikave publike.
“Është nevojshme që gjithë kohën ata të jenë pjesë aktive në procesin e krijimit të ligjeve dhe hartimit të politikave publike. Kosova është një demokraci e re, me një traditë parlamentare në fillet e saj, por duhet theksuar se që nga fillimi, Kuvendi i Kosovës ka qenë i përkushtuar ndaj pjesëmarrjes qytetare dhe bërjes transparente të punës së tij”, ka thënë Veseli.
Veseli tha se njësoj sikurse seancat parlamentare, edhe komisionet parlamentare duhet të transmetohen gjerësisht në media.
“Niveli i qasjes së gazetarëve në informatat parlamentare duhet të jetë në nivelin e standardeve më të larta demokratike. Ne kemi përmirësuar qasjen fizike të medieve dhe po zgjerojmë mundësitë e transmetimit medial. Në ueb-faqen e Kuvendit të Kosovës ka mungesa dhe aktualisht jemi duke punuar në disa ide që kjo ueb-faqe të dinamizohet dhe pasurohet me të gjitha informatat që janë me interes për mediet dhe qytetarët”, u shpreh Veseli.
Kryetari i Kuvendit tha se transparenca e llogaridhënia janë vlera të pandashme nga njëra-tjetra.
“Unë zotohem nga kjo tryezë që bashkë me ju dhe të gjithë deputetët, Kuvendin e Kosovës ta bëjmë plotësisht të hapur në përputhje me standardet më të larta ndërkombëtare të transparencës parlamentare”, është shprehur ai./TeSheshi/
