Vërshimet e ujërave që ndodhën në 4 Gusht në Shipkovicë kanë nxjerrë në dritë varreza që mendohet se i përkasin periudhës ilire. Kështu mendon Abdullah Mehmeti nga Universiteti Shtetëror i Tetovës i cili ka postuar edhe fotografi të marra në Shipkovicë, ku nga vërshimet janë zbuluar disa varreza të vjetra.
“Mënyra e varrimit, orientimi i kufomës dhe karakteristika të tjera dëshmojnë qartë se bëhet fjalë për varreza ilire të cilat i takojnë periudhës para ardhjes së krishterimit në këto hapësira, së paku para 2000-3000 vjetësh”, shkruan Mehmeti.
Ai thotë se ekzistencën e tyre e ka trajtuar së bashku me profesor Fadil Sulejmanin në një studim para 23 vjetësh.
“ Gjatë ndërtimit të shtëpisë në afërsi të së cilës tani është zbuluar ky varr, atëherë u zbuluan dy varre të tilla, por që të mos keqpërdoreshin nga pushteti i atëhershëm dhe pseudoshkencëtarët janë pritur kohë më të mira për gërmime arkeologjike dhe studime të hollësishme në lidhje me ato”, sqaron për median Mehmeti.
Sipas tij, ka të dhëna se në vitet ’60 të shekullit të kaluar, në këtë hapësirë është gjetur edhe një rrasë me mbishkrim dhe gjetje të tjera arkeologjike, të cilat, sugjeron Mehmeti, nga bashkëpunëtorët vendës të pushtetit komunist sigurisht kanë përfunduar në Beograd.
“E tërë ajo lagje, dikur ka qenë pronë e kishës, gjatë kohës së sundimit osman ka qenë vakëf, ndërsa në kohën e mbretërisë jugosllave, ka qenë pronë e komunës së asaj kohe. Mehmeti shkon edhe më tej duke thënë se dega e PKJ-së në Shipkovicë, ua dha truallin për ndërtim disa familjeve, me qëllim të mbulimit të gjurmëve dhe pamundësimin e gërmimeve arkeologjike të mëvonshme. /tesheshi.com/
